No Lusim Love wea Iu Garem Firstaem
1 Bihaen Jesus kasem glory long heven, hem talem disfala kaonsel long kongregeson long Ephesus bifor: “Wanfala samting wea mi no laekem nao, hem wei wea iu lusim datfala love wea iu garem firstaem.” (Rev. 2:4) Luk olsem, love wea plande garem for Jehovah hem no strong olsem firstaem. Taem iumi lanem truth, datwan helpem iumi for garem strongfala love for God and pipol. Diswan muvim iumi for busy for talemaot datfala niu hope wea iumi garem. Wanem nao bae helpem iumi for no lusim datfala love wea iumi garem firstaem and for no lusim strong wea iu garem for ministry?
2 Study Seleva and Attendim Meeting: Taem iumi firstaem lanem truth, wanem nao mekem iumi lovem God and pipol? Samting wea mekem iumi garem diskaen love hem nao wei wea iumi studyim Bible and lane abaotem God! (1 John 4:16, 19) Dastawe, sapos iumi laekem love bilong iumi for “kamap moa big,” iumi mas gohed for kasem stretfala savve and trae hard for minim “olketa deep samting abaotem God.”—Phil. 1:9-11; 1 Cor. 2:10.
3 From iumi stap long olketa last day distaem plande samting savve mekem iumi busy and wari. Diswan savve mekem hem hard lelebet for garem gud schedule for study seleva. (2 Tim. 3:1) Iumi mas markem taem for kaikaim spiritual kaikai. Wei for attendim meeting bilong kongregeson tu hem barava important. Diswan hem barava fitim distaem from iumi “lukim hao datfala day hem kakam klosap nao.”—Heb. 10:24, 25.
4 Ministry: Wei for strong for duim ministry hem helpem iumi for no lusim firstfala love wea iumi garem for God. Taem iumi preach abaotem gud nius hem helpem iumi for tingim olowe olketa promis wea Jehovah talem, wea showimaot hem lovem iumi. Taem olsem, hope bilong iumi bae strong fogud and love bilong iumi bae no dae. From iumiseleva mas minim gud firstaem olketa truth insaed Bible bifor iumi teachim narawan, diswan minim iumi mas duim research. Taem iumi duim datwan bae iumi strongim faith bilong iumi.—1 Tim. 4:15, 16.
5 Jehovah hem fit for kasem evri samting. So, hem fit for kasem love bilong iumi tu. (Rev. 4:11) No letem disfala love iumi garem for Jehovah for dae. Taem iumi study seleva, attendim meeting evritaem, and strong for talem olketa narawan abaotem disfala samting wea iumi lovem tumas, bae iumi gohed for strongim love wea iumi garem firstaem.—Rom. 10:10.