Leta From Governing Body
LONG wei for followim example bilong Jesus, mifala prea olsem long God: “Mifala laekem for evriwan mas ting long nem bilong iu olsem hem holy.” Wei wea iumi laekem tumas for followim toktok long datfala prea bae showaot long olketa samting wea iumi duim. Tru nao, iumi need for duim moa samting winim wei for just savve nomoa nem bilong God hem Jehovah. Iumi mas iusim evri chance for givim glory long datfala nem. Tru nao, barava nambawan samting winim eni nara samting nao hem for garem nem Jehovah’s Witness.—Matt. 6:9; Isa. 43:10.
For fitim toktok long Psalm 110:3, pipol bilong Jehovah willing for duim waka wea Jehovah komandim olketa for duim. Why nao pipol wea garem difren age and living iusim taem and strong bilong olketa for preach? Main reason hem bikos olketa lovem God and givim olketa seleva for servem hem. Deuteronomy 6:5, 6 komandim iumi for lovem Jehovah from ‘full heart, soul, and strong bilong iumi.’ Disfala love wea kam from heart muvim iumi for iusim taem, strong, and olketa samting wea iumi garem for sapotim Kingdom bilong God, wea wanfala nao hem for duim samting iumi fit for duim long ministry.
Love wea Jehovah garem for olketa man muvim hem for markem pipol bilong hem for talemaot gud nius abaotem Kingdom bilong hem evriwea long earth. Hem no laekem eniwan for distroe bat hem laekem evriwan for repent from olketa nogud samting wea olketa duim and for servem Creator bilong olketa mekem olketa gohed for laef. (2 Pet. 3:9) Jehovah hem sei: “Mi hapi, no taem wicked man hem dae, bat taem samwan wea wicked hem lusim nogud wei bilong hem and gohed for stap laef.” (Ezek. 33:11) Taem iumi duim ministry, datwan hem showimaot klia hao Jehovah lovem olketa man. For sure, diswan hem wanfala reason why iumi hapi and satisfae taem iumi duim disfala barava important waka.
Wei wea iumi ting long Word bilong God nao hem showimaot bigfala love bilong iumi for Jehovah. Hem bae hard for iumi savve abaotem God and for fren gud witim hem olsem James 4:8 encouragem iumi for duim, sapos iumi no garem Bible. And tu, iumi bae no savve why God creatim iumi and wanem bae happen long future. Iumi bae no savve hao Adam, wea hem dadi bilong iumi evriwan, hem startim wei for iumi garem olketa problem. (Rom. 5:12) Iumi bae no savve tu long bigfala love wea God showimaot taem hem givim Son wea hemseleva nao wakem for olsem ransom for iumi. Long plande nara wei, Jehovah givim long iumi savve, wisdom and wei for minim samting. Iumi barava tinghae long present hem givim iumi, wea hem nao Word bilong hem wea spirit muvim olketa man for raetem! Wei wea iumi tinghae long disfala nambawan present muvim iumi for ‘baem taem’ for readim, studyim, and ting raonem olketa toktok bilong hem. (Eph. 5:15, 16; Ps. 1:1-3) Iumi shud no feel nogud from wei wea iumi need for iusim taem for readim Word bilong God evriday. Bat love wea iumi garem for God shud muvim iumi for laek readim Word bilong hem, wea diswan bae mekem iumi garem moa savve abaotem hem and mekem love wea iumi garem for hem kamap moa big.
Iumi lanem from Bible hao taem Adam sin againstim Jehovah, hem mekem evri pikinini wea born bihaen long datfala taem wea insaed datwan hem iu and mi, garem living wea barava nogud and no garem eni hope. Bat God hem mekem wei kamap for helpem iumi olketa man, and hem duim olketa samting for mek sure plan bilong hem for earth kamap Paradaes hem fulfill.—Gen. 3:15.
For sure, iumi evriwan barava laekem tumas for mekhae long nambawan nem bilong God bilong iumi. Taem iumi minim go moa wei wea Jehovah hem wanfala nambawan God, diswan muvim iumi for waka tugeta witim hem and organization bilong hem for talem nara pipol abaotem nambawan plan and nem bilong hem. Iumi savve feel sure hao hem hapi and sapotim iumi distaem, and hao iumi bae garem laef long future long niu world wea bae gohed for olowe.
Mifala long Governing Body laek for talem love bilong mifala long iufala olketa brata and sista. Mifala barava tinghae tumas long wei wea iu waka hard for iusim lelebet taem wea stap distaem bifor “datfala big trabol” hem kam for preachim gud nius long plande pipol. (Rev. 7:14) Taem iu duim datwan, iu mekem olketa garem sem chance wea iu garem for kasem datfala savve abaotem God and Christ wea mekem man kasem laef olowe.—John 17:3.
Olketa brata bilong iufala,
Governing Body bilong Olketa Jehovah’s Witness