Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long June 25, 2007. Skul overseer bae conductim wanfala 30-minute review long information wea kamap insaed olketa assignment start long week bilong May 7 go kasem June 25, 2007. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Wanem nao iumi savve duim for mekem voice bilong iumi for barava klia taem iumi story? [be-SP p. 184 par 3–p. 185 par. 1-2] First samting, iumi need for garem stretfala tingting abaotem olketa wea lisin long iumi. Sapos hem olketa pipol wea iumi meetim long ministry, iumi shud rememberim hao olketa need for herem olketa important samting abaotem plan bilong Jehovah wea iumi savve, nomata olketa luksavve long datwan or nomoa. Sapos iumi givim tok long Kingdom Hall, iumi shud rememberim hao olketa hia fren bilong iumi, and olketa laekem iumi for win. Mek-tu samting, voice bilong iumi bae barava klia sapos iumi mekem olketa masol long nek, throat, and shoulder hem relax.
2. Hao nao iumi savve “kamap evri samting long evrikaen pipol” long ministry? (1 Cor. 9:20-23) [be-SP p. 186 par. 2-4] Wanfala wei hem for luksavve long interest bilong pipol, religion bilong olketa, or living insaed famili bilong olketa, bifor iumi story witim olketa. Tingting gud firstaem abaotem hao iu savve story long man wanwan and hao datwan bae helpem olketa. Iumi shud markem olsem goal bilong iumi for preparem samfala point from Bible wea fitim each wan wea bae iumi meetim long ministry. (1 Tim. 2:4)
3. Hao nao iumi savve followim example bilong Jehovah saed long wei for lisin long narawan? (Gen. 18:23-33; 1 Ki. 22:19-22) [be-SP p. 187 par. 1-2, 5] Iumi savve duim diswan long wei for encouragem pipol for talemaot tingting bilong olketa and for barava lisin gud taem olketa story. Askem wanfala kwestin wea fitim, then givim inaf taem for olketa givim ansa. Wei wea iumi “kwiktaem for lisin” hem showimaot iumi respectim tingting and feeling bilong nara pipol. (Jas. 1:19; Rom. 12:10)
4. Wanem nao olketa gudfala wei wea iumi savve helpem nara pipol for muv ahed long spiritual wei? [be-SP p. 187 par. 6–p. 188 par. 3] Wei for prea for nara pipol bae muvim iumi for no forgetim olketa and tingim olketa truth bilong Bible wea bae barava fitim need bilong olketa. Maet iumi helpem Bible student for duim research insaed olketa pablikeson bilong iumi abaotem hao for deal witim olketa samting wea hem feisim. Goal bilong iumi hem for evritaem letem Word bilong God and spirit bilong hem nao for muvim olketa, from pipol wea willing nao Jehovah laekem olketa for servem hem. (Ps. 110:3)
5. Why nao iumi shud respectim narawan? [be-SP p. 190 par. 3, box] For showimaot respect for narawan hem wanfala mark bilong olketa Christian and hem savve mekem nara pipol moa willing for acceptim message wea iumi talemaot. Wei for respectim nara pipol savve mekem hem moa isi for iumi talemaot gud nius.
TOK NO. 1
6. Why nao iumi mas trae for kasem heart bilong olketa wea iumi teachim olketa? [be-SP p. 59 par. 1] Diswan hem important bikos tru worship hem no minim for baeheartim nomoa samfala information and for followim samfala rul nomoa. Wei for fren gud witim Jehovah and for tinghae long olketa wei bilong hem nao faondeson bilong diswan. (Deut. 10:12, 13; Luke 10:25-27)
7. Example bilong iumi savve affectim olketa wea iumi teachim olketa long wanem wei? [be-SP p. 60 par. 4] Samting wea iumi duim hem provaedem gudfala example long hao for duim olketa samting wea iumi teachim. Olketa pikinini wea laek for copyim parents bilong olketa, olketa laek for savve hao nao hem feel for duim samting wea mami and dadi duim. Long sem wei, taem olketa wea iumi teachim ‘kamap olketa wea followim example bilong iumi olsem iumi followim example bilong Christ,’ olketa start for kasem olketa blessing wea kam taem iumi followim olketa wei bilong Jehovah. (1 Cor. 11:1)
8. Hao nao iumi savve mekem wei for story hem kamap moabeta long haos? [be-SP p. 62 par. 3] Wei for barava kea for narawan nao main key for mekem wei for story hem kamap moabeta. (Deut. 6:6, 7; Prov. 4:1-4) Nara important key hem for garem wanfala gud story for talem. Taem iumi sharem olketa point from Bible reading and study seleva, gudfala samting wea iumi kasem long ministry, and olketa nara subject wea savve strongim man, datwan bae mekem famili savve enjoyim gudfala wei for story.
9. Wanem example long wei for no fraet and strong for duim samting nao iumi lukim long profet Jeremiah? [bsi07-SP p. 3 par. 36] Jeremiah hem no fraet for talemaot message wea pipol wea no lovem God no laek for herem. Hem les for kaban witim wicked pipol. Hem luksavve hem mas hariap for talemaot message bilong Jehovah, and hem duim waka bilong Jehovah and nating givap. Word bilong God hem olsem fire insaed bon bilong hem, and datwan nao mekem heart bilong hem hapi. (Jer. 15:16, 17; 20:9)
10. Lamentations hem talemaot wanem kaen wei for trustim Jehovah, bat why nao hem gud hao datfala buk showim hao God bae barava judgem wicked pipol? [bsi07-SP p. 5 par. 13] Buk bilong Lamentations hem storyim wei wea Jeremiah hem trust evribit long God. Datfala buk shud muvim evri tru worshiper for obey and garem faithful fasin, and long semtaem hem givim warning for olketa wea no laek for tingim nambawan nem bilong God and mining bilong datwan. Datfala buk hem barava helpem iumi taem hem storyim hao God bae barava judgem wicked pipol wea gohed for bighed and no laek repent.
BIBLE READING EVRI WEEK
11. From samting wea kasem Jeremiah wea Jeremiah 37:21 storyim, iumi savve feel sure long wanem? Jehovah strongim Jeremiah taem olketa bilong Babylon attakim Jerusalem, taem pipol ‘kaikaim bred wea olketa measurem and wea olketa careful tumas witim’ and taem samfala woman kaikaim pikinini bilong olketa seleva. (Ezek. 4:16; Lam. 2:20) Samting wea kasem Jeremiah mekem olketa faithful servant bilong Jehovah for trustim hem nomata maet luk olsem no eni help stap nao, Hem savve strongim iumi long olketa last day hia go kasem Armageddon. [May 7, w97-SP 9/15 pp. 3-4; w76 p. 501]
12. Why nao maet Baruch sei Jehovah ‘joinim kam sorre long pain bilong hem,’ wea mekem hem ‘feel taed,’ and wanem nao first samting wea Baruch duim abaotem datfala problem? (Jer. 45:1-5) Maet Baruch hem sorre and taed tumas from wei wea olketa Jew no duim samting followim olketa warning wea olketa kasem evritaem and olketa gohed for followim apostate fasin bilong olketa. Dastawe Baruch start for ‘lukaotem bigfala samting for hemseleva,’ maet hem olketa material samting and gudfala living or bignem. Jehovah remindim hem hao hem feisim trabol; dastawe, hem no taem for aftarem olketa samting wea bae stopem olketa spiritual samting. [May 21, w06 8/15 pp. 17-18; w97-SP 8/15 p. 21]
13. Wanem taem nao no eni pipol stap long Babylon and hem kamap “wanfala ples wea emti evribit”? (Jer. 50:13) Bihaen long 140 B.C.E., graon wea stap raonem Babylon hem mix witim salt and alkali, wea mekem hard for eni samting long garden hem grow. Samting olsem 200 year bihaen, staka pipol stap yet long taon bilong Babylon, bat hem no stap olowe olsem. (1 Pet. 5:13) Kasem mek-thri century C.E., datfala man for raetem history Dio Cassius (c. 150-235 C.E.) storyim hao wanfala man wea visitim Babylon hem lukim ples hem emti, and samting wea datfala man faendem nomoa hem olketa “hip graon and olketa ston and olketa samting wea distroe finis.” [May 28, ct pp. 106-7]
14. Wanem principle abaotem prea nao hem showaot klia long Lamentations 3:8, 9, 42-45? Long 607 B.C.E., Jehovah no lisin long olketa prea bilong olketa Jew wea bighed. For olketa prea bilong iumi kasem ansa, iumi mas obeyim God and barava repent from heart. (Prov. 28:9) [June 18, w06-SP 9/1 p. 20 par. 4]
15. Wanem nao datfala chariot wea Ezekiel chapter 1 storyim hem piksarem? Disfala barava spesol chariot hem piksarem datfala part long organization bilong Jehovah wea iumi no savve lukim, wea evri faithful spirit creature bilong God nao insaed. Jehovah hem nao raedem disfala chariot long wei for iusim diswan for fulfillim plan bilong hem. (Ps. 103:20; Ezek. 1:22, 25, 26, 28) Disfala chariot hem duim samting kwiktaem followim will bilong God and savve muv long eni ples and long enitaem wea spirit bilong God leadim hem. (Ezek. 1:12, 14) [June 25, od p. 9; w91 3/15 pp. 10-11]