Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long August 27, 2007. Skul overseer bae conductim wanfala 30-minute review long information wea kamap insaed olketa assignment start long week bilong July 2, go kasem August 27, 2007. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Wanem nao showimaot iumi respectim pipol wea iumi meetim long ministry, and tu, olketa insaed long kongregeson? [July 2, be-SP p. 192 par. 2-4] Taem iumi story witim pipol long preaching waka, iumi shud stap klia long wei for kwiktaem talemaot hao samfala tingting bilong olketa hem rong. And tu, iumi lisin long patient wei and tingim feeling bilong olketa. (1 Pet. 3:15) Long kongregeson iumi respectim olketa brata bilong iumi taem iumi rememberim hao olketa lovem Jehovah and laek for servem hem. Olketa wea lisin long iumi bae luksavve iumi respectim olketa sapos iumi stap klia long wei for evritaem iusim word “iu” taem iumi showimaot wei wea iumiseleva tu need for followim olketa scripture.
2. For showimaot iumi barava bilivim wanem iumi storyim, hem barava important for iumi hao? [July 16, be-SP p. 196 par. 1-3] Hem barava important for iumi bilivim evribit hao samting wea iumi talem hem tru, and tu, toktok bilong iumi mas kam from heart. Wei for minim gud datfala information and iusim toktok bilong iumiseleva for explainim hem showimaot iumi biliv strong hao samting wea iumi talem hem important tumas for audience herem.
3. Wanem nao samfala idea wea bae helpem iumi for tingim feeling bilong pipol taem iumi witness long olketa? [July 30, be-SP p. 198 par. 1-5] Trae for startim story long subject wea nara man hem interest long hem. Wei for tingim tingting bilong pipol bae helpem iumi for story witim olketa and no tok daonem olketa. Iumi savve askem iumiseleva olsem, ‘Wanem nao tingting bilong man wea mi story witim abaotem samting wea mi talem?’ Diswan savve helpem iumi for garem gudfala tingting and no talem toktok wea maet stopem wei for story. (Prov. 12:8)
4. Hao nao wei for tingim feeling bilong pipol hem minim tu for disaedem best taem for witness long narawan? (Prov. 25:11) [Aug. 6, be-SP p. 199 par. 1-3] Nomata maet iumi no agree witim evri samting wea haosholder talem, iumi no need for challengem evri point wea hem talem wea againstim Bible. (John 16:12) Mas patient, and no trae for kwiktaem pruvim samting taem man no agree witim iu. Bossim feeling and ting long diswan olsem chance for minim tingting bilong nara man.
5. Hao nao iumi savve givim olketa tok bilong iumi long wei wea bae buildimap man? [Aug. 27, be-SP p. 203 par. 3–p. 204 par. 1] Sapos iumi feel sure hao olketa brata and sista bilong iumi laek for mekem Jehovah hapi, datwan bae showaot long samting wea iumi talem and hao iumi talem. (1 Thess. 4:9, 10; 2 Thess. 3:4, 5) Nomata taem iumi mas givim kaonsel for stretem samting, hao iumi toktok savve buildimap man sapos main samting wea iumi strongim hem wei for stap klia long rong fasin and wei wea olketa mark bilong Jehovah protectim iumi. (Ps. 119:1)
TOK NO. 1
6. Hu nao raetem Bible buk bilong Ezekiel, and wanem nao pruvim hem part bilong Bible and hem tru? [July 2, bsi07-SP pp. 6, 7 par. 3] Olketa putim buk bilong Ezekiel insaed Bible long taem bilong Ezra and hem stap insaed olketa list long taem bilong olketa first Christian, main wan nao buk bilong Origen. Samting wea pruvim tu wei wea hem tru hem olketa saen wea semsem olsem olketa insaed long Jeremiah and Revelation.
7. Wanem nao wanfala main fasin wea man mas garem mekem hem savve gohed stand strong nomata hem kasem samting wea no followim justice? [July 9, w05-SP 6/1 p. 29 par. 4] Hambol fasin hem barava important. Man wea tinghae tumas long hemseleva bae no acceptim wei wea pipol deal witim hem long nogud wei. Iumi mas traem best for followim Jesus, wea “mekem hemseleva hambol and obey go kasem taem hem dae.” (Phil. 2:5, 8) And tu, iumi mas lane for tingim hao olketa narawan “important” winim iumi, and duim samting olketa laekem firstaem long wanem iumiseleva laekem. (Phil. 2:3, 4)
8. Wanem nao iumi lanem from ansa bilong Jesus taem olketa Sadducee askem kwestin abaotem resurrection? (Luke 20:37, 38) [July 23, be-SP p. 66 par. 4] Jesus savve hao olketa Sadducee no biliv long resurrection. So taem hem ansa, hem ansarem kwestin bilong olketa long wei wea deal witim rongfala tingting bilong olketa wea hem nao samting wea muvim olketa for askem datfala kwestin. Jesus iusim nambawan wei for pullim tingting and wanfala story long Bible wea olketa savve gud for showim wanfala samting wea olketa nating tingim bifor—hem nao kliafala pruv hao God bae resurrectim pipol wea dae finis.
9. Taem wanfala Bible student or wanfala brata or sista askem iu wanem nao hem shud duim abaotem wanfala samting, hao nao iu shud ansa? [July 30, be-SP p. 69 par. 4-5] Evri man wanwan mas givim ansa for olketa samting wea hem disaedem long laef bilong hem. (Gal. 6:5) Man wea mekem olketa disison for mekem man wea studyim Bible witim hem or eni nara man hapi nomoa hem servem olketa man, and hem no showimaot faith. (Gal. 1:10) So, taem iu helpem samwan for faendem ansa for kwestin bilong hem, best samting nao for showim olketa Bible principle and example and askem hem sapos hem lukim eni samting wea savve helpem hem for disaed long wisefala wei.
10. Wanem nao insaed long wei for “kamap niu long paoa wea muvim mind bilong iufala”? (Eph. 4:23) [Aug. 13, be-SP p. 74 par. 4] For werem datfala “niufala fasin” iumi mas mekem wanfala strongfala wei for tingting wea wan mind witim tingting bilong God and Christ. (Eph. 4:23, 24) For duim diswan iumi mas evritaem herem tingting bilong tufala. Taem iumi studyim olketa Gospel, iumi shud ting long olketa samting wea happen insaed laef bilong Christ olsem wanfala example for iumi followim. Iumi shud trae for luksavve long samfala fasin bilong Jesus and then barava trae hard for followim. (1 Pet. 2:21)
BIBLE READING EVRI WEEK
11. Long Ezekiel 9:2-4, man wea werem linen kaleko hem piksarem hu, and wanem nao “mark long forhed bilong olketa man” hem minim? [July 2, w88 9/15 p. 14 par. 18] Man wea werem linen kaleko hem piksarem sekson bilong olketa anointed Christian long earth distaem. Olketa putim wanfala tokpiksa mark long olketa wea insaed long datfala “big crowd,” wea “feel nogud and wea krae” from evri nogud samting wea pipol long olketa false Christian religion duim. (Rev. 7:9, 10, 14) Datfala “mark” hem wei wea man hem dedicate and baptaes and garem fasin olsem Christ.
12. Long wanem wei nao olketa bigman bilong olketa false religion olsem “olketa krangge profet wea followim tingting bilong olketa seleva” wea Ezekiel 13:3 hem story abaotem? [July 9, w99-SP 10/1 p. 13] Olsem olketa bigman bilong religion wea stap long taem bilong Ezekiel, olketa bigman bilong olketa false Christian religion fail for warnim pipol abaotem day bilong judgment bilong God. Olketa bigman hia no talemaot hao Kingdom bilong Jehovah wea rul finis bae klosap duim samting long disfala earth. (Dan. 2:44) Olketa sei olketa story long nem bilong God, bat olketa talem nomoa samting wea pipol laek for herem.
13. Taem olketa Israelite talem “toktok” wea stap long Ezekiel 18:2, wanem nao olketa trae for duim, and wanem important leson abaotem wei for givim ansa nao showaot long hia? [July 23, w88 9/15 p. 18 par. 10] Taem datfala nation kasem olketa barava nogud samting, olketa Israelite trae for sei olketa no guilty long datwan. Olketa sei olketa nogud samting hia kamaot from wicked fasin bilong olketa laen dadi bilong olketa. Bat Ezekiel sei each wan garem responsibility for fasin bilong hemseleva and hem mas givim ansa long Jehovah for datwan. (Ezek. 18:20, 27-30)
14. Long wanem wei nao Ezekiel hem “no savve toktok” taem olketa attakim and finisim evribit Jerusalem? (Ezek. 24:27; 33:22) [Aug. 6, w03-SP 12/1 p. 29] Diswan no minim Ezekiel no savve toktok long really wei. Diswan minim hem no garem eni toktok moa for talem abaotem Jerusalem taem judgment bilong Jehovah kasem datfala ples. Nomata olsem, hem talemaot olketa judgment message abaotem olketa enemy bilong pipol bilong God wea hapi tumas taem Jerusalem hem distroe. (Ezek., chap. 25-32) Bihaen, taem olketa wea stap long Babylon herem hao Jerusalem hem distroe, Ezekiel talemaot profesi hao ples hia bae kamap gud moa long future.
15. Hu nao “Gog bilong land bilong Magog,” and wanem taem nao hem duim samting for distroem pipol bilong Jehovah? (Ezek. 38:2, 16) [Aug. 27, w97-SP 3/1 p. 14 par. 1–p. 15 par. 3] Gog bilong Magog hem minim Satan start long taem wea Jesus aotem hem from heven and hem stap nomoa raonem earth. (Rev. 12:13, 17) Hem leadim wanfala grup bilong olketa nation, and bihaen Bigfala Babylon hem distroe hem bae attakim pipol bilong Jehovah from olketa luk olsem olketa no strong. (Ezek. 38:4-6, 8, 11, 15; Rev. 17:12-14) Disfala attak nao hem start bilong Armageddon, taem Jehovah apim rul bilong hem and sevem pipol bilong hem. (Ezek. 38:21-23)