Leta From Governing Body
Dear Olketa Witness Bilong Jehovah:
Aposol Paul hem evritaem showimaot love and hem tinghae long olketa Christian brata and sista. Hem raet olsem long olketa Christian long Rome: “Mi talem thankiu long God bilong mi for iufala evriwan long nem bilong Jesus Christ, bikos pipol tok abaotem faith bilong iufala evriwea long world.” (Rom. 1:8) Tru nao, long evri kantri wea Rome rulim long taem bilong Paul, pipol savve long strongfala faith bilong olketa Christian and wei wea olketa strong for preach. (1 Thess. 1:8) Datwan mekem Paul for barava lovem olketa brata!
Olsem Paul, mifala evritaem talem thankiu long Jehovah taem mifala tingim iufala. Mifala barava lovem iufala evriwan! And Jehovah tu barava lovem iufala wanwan. Samfala long iufala kasem hardfala taem, bat iufala gohed nomoa for preach. Jehovah mas hapi tumas long wei wea iufala gohed strong and no fraet!—Prov. 27:11.
Taem iufala readim and ting raonem “Olketa Samting wea Olketa Jehovah’s Witness Duim Distaem” wea stap long Yearbook, diswan bae mekem iufala hapi and strongim faith bilong iufala. Bae iufala lukim staka samting wea showimaot hao Lord Jesus Christ hem “go for faet and winim faet bilong hem” and eni samting wea olketa iusim for faet againstim olketa follower bilong Jesus bae no win.—Rev. 6:2; Isa. 54:17.
Paul raet long olketa Christian long Philippi olsem: “Mi thankiu . . . long God bilong mi . . . bikos long waka wea iufala duim for gud nius.” (Phil. 1:3-5) Mifala long Governing Body garem sem tingting tu abaotem iufala. Long 2007 service year, 6,691,790 pablisa olketa duim 1,431,761,554 hour for preachim gud nius long 236 kantri. Samting wea iufala duim for talemaot gud nius hem barava nambawan! From iumi evriwan waka tugeta for helpem staka handred thousand pipol, datwan givim bigfala praise long Jehovah!
Long narafala taem, Paul showimaot hao hem barava tingim feeling bilong olketa brata. Hem raet go long olketa long Thessalonica olsem: “Mifala evritaem tingim . . . wei wea iufala stand strong from iufala garem hope long Lord Jesus Christ bilong iumi front long God and Dadi bilong iumi.” (1 Thess. 1:2, 3) Tru nao, staka problem savve kasem iumi, bat iumi mas gohed strong. Waswe long iu, wanem kaen problem nao iu kasem? Waswe, iu wikdaon bikos iu kasem bigfala sik wea stopem iu for duim staka samting wea iu laek for duim for worshipim Jehovah? Waswe, hasband or waef bilong iu wea iu lovem tumas for staka year hem dae? (Prov. 30:15, 16) Waswe, iu gohed for lukaotem samwan for maritim wea garem love for Jehovah olsem iu, mekem iu obeyim toktok long Bible for maritim samwan wea baptaes finis? (1 Cor. 7:39) Waswe, iu waka hard for lukaftarem pikinini bilong iu nomata hem hard tumas for kasem inaf selen long ples wea iu stap? Nomata wanem samting kasem iufala, sapos iufala gohed for duim Kingdom waka, iufala savve hao Jehovah bae no “forgetim waka bilong iufala and love wea iufala showimaot for nem bilong hem.” Plis, olketa brata and sista, “gohed for duim gudfala samting”!—Heb. 6:10; Gal. 6:9.
Wanem nao bae mekem iufala for gohed strong? Olsem olketa long Thessalonica, hem datfala “hope long Lord Jesus Christ bilong iumi.” Paul hem markem “disfala hope for sev” olsem wanfala strong hat wea savve protectim wanfala Christian from nogud tingting and olketa samting wea savve mekem man wari.—1 Thess. 5:8.
Tru tumas, taem iufala hapi for gohed strong, iufala showimaot hao toktok bilong Satan abaotem hu nao fit for rulim universe hem laea toktok nomoa. Satan hem talem hao olketa wakman bilong God tingim olketa seleva nomoa and olketa bae worshipim God for lelebet taem. Gogo, sapos olketa kasem barava hardfala taem or sapos disfala world hem no finis long taem wea olketa tingim, olketa bae wikdaon long worship bilong olketa. Iufala stap long wanfala taem wea iufala savve showimaot hao Devil hem man for laea! Evriday wea iufala wekap, hem wanfala day klosap long hope bilong iufala.
Paul hem evritaem praisem olketa brata for strongfala faith bilong olketa, bigfala samting wea olketa duim long wei for preach, and wei wea olketa gohed strong, mifala tu hapi for praisem iufala and for talem moa hao mifala lovem iufala. Gohed for duim gudfala waka!
Masbi disfala year baebae iumi garem staka spiritual blessing. Mifala barava tingim iufala, mifala
Olketa brata bilong iufala,
Governing Body bilong Olketa Jehovah’s Witness