“Showimaot Iufala Thankiu”
1 Taem Jesus healim tenfala man wea garem leprosy, wanfala nomoa hem kam for talem thankiu long hem. Jesus hem tok olsem: “Tenfala leprosy man nao kamap klin, hem tru? So wea nao nara naenfala?” (Luke 17:11-19) Hem barava gud tumas for iumi showimaot iumi tinghae and talem thankiu for evri gudfala samting wea kam from kaenfala Dadi bilong iumi long heven, Jehovah God!—Col. 3:15; Jas. 1:17.
2 Wanem nao samfala samting wea iumi mas thankiu long hem? Iumi thankiu long ransom, wea datwan hem nambawan samting wea God givim for olketa man. (John 3:16) Iumi talem thankiu long Jehovah from hem helpem iumi for savve long hem. (John 6:44) Nara samting for iumi talem thankiu hem wei wea iumi olketa Christian waka tugeta. (Ps. 133:1-3) Luk olsem, iu savve tingim staka nara gudfala samting wea Jehovah givim long iu. Iumi no laek for olsem olketa Israelite wea no tinghae long olketa samting wea Jehovah duim for olketa!—Ps. 106:12, 13.
3 Showimaot Thankiu: Tenfala man wea garem leprosy maet hapi long wanem Jesus duim long olketa, bat wanfala nomoa hem showimaot thankiu. (Luke 17:15) Iumi tu savve showimaot wei for tinghae taem iumi strong for duim preaching waka. Sapos iumi barava laek for showimaot wei for tinghae long evri samting wea kaenfala Dadi bilong iumi long heven hem duim, iumi bae storyim love bilong hem and wei wea hem kaen tumas long olketa narawan. (Luke 6:45) So, taem iumi storyim ‘olketa nambawan waka and tingting bilong [Jehovah] abaotem iumi,’ diswan bae mekem love and wei wea iumi tinghae long Jehovah for strong go moa.—Ps. 40:5.
4 Helpem Olketa Narawan for Tinghae: Iumi mas evritaem trae for helpem olketa pikinini and olketa Bible study bilong iumi for garem wei for tinghae. Olketa mami and dadi savve duim diswan taem olketa story witim olketa pikinini abaotem olketa nambawan samting wea Jehovah wakem. (Rom. 1:20) Iumi savve askem Bible study bilong iumi olsem, “Wanem samting abaotem Jehovah nao iumi lanem from diswan?” Love and wei wea datfala study laek for mekem God hapi bae barava big go moa taem hem gohed for lanem wei for tinghae.
5 Long olketa last day distaem, staka pipol no showimaot wei for tinghae and olketa no savve talem thankiu. (2 Tim. 3:1, 2) Jehovah mas barava hapi taem hem lukim olketa gudfala wakman bilong hem olketa showimaot wei for tinghae taem olketa strong for duim preaching waka!—Jas. 1:22-25.