Waswe, Iu Tinghae Long Olketa Buk Bilong Iumi?
1 Pipol tinghae long olketa diamond and olketa spesol ston no from olketa luk naes nomoa, bat bikos man mas waka hard and spendem staka selen for lukaotem. Savve abaotem Jehovah and Jesus Christ hem winim olketa ston olsem and long full world olketa buk bilong iumi nomoa storyim long wei wea showimaot savve bilong God. (Rom. 11:33; Phil. 3:8) Hao nao iumi savve showimaot iumi tinghae long olketa buk bilong iumi?
2 Staka pablisa and famili savve evritaem markem contribution for tekem go long Kingdom Hall for putim insaed wanfala contribution box wea garem nem “Waka Raonem World—Matthew 24:14.” Olketa pablisa savve givim contribution for waka raonem world taem olketa tekem olketa buk and magasin for preaching and taem olketa putim donation wea pipol long preaching givim.
3 Narafala wei iumi savve showaot iumi tinghae, hem long wei wea iumi no givim buk olobaot long pipol wea iumi faendem long preaching. Hard tumas for iumi givim diamond wea garem hae price long wanfala smol pikinini wea no savve long kost bilong hem. Long sem wei tu, iumi no givim olketa naesfala buk long pipol wea no tinghae long Bible. (Markem witim Heb. 12:16.) Iumi willing for story long pipol and givim olketa buk, bat iumi mas garem gudfala tingting long hu nao iumi bae givim buk long hem. Waswe, iutufala haosholder story gud? Waswe, hem herehere long story bilong iumi, ansarem olketa kwestin, and luk followim taem iumi readim Bible? Sapos man showimaot interest olsem, iumi hapi for givim wanfala buk. Taem iumi iusim olketa buk bilong iumi for duim Bible study witim pipol, datwan helpem olketa for savve wanem nao Bible teachim and datwan helpem olketa for fren gud witim Jehovah. Gudfala samting bae kamaot from olketa buk bilong iumi sapos iumi iusim long gudfala wei.
4 Olketa buk stap nating long Kingdom Hall or long haos no givim yet eni gudfala samting long man. Iumi savve iusim tu olketa old magasin, brochure, buk, and tract. Waswe, iu enitaem kaontem haomas buk and magasin nao iu garem long haos for iusim long preaching? Maet iumi sapraes for faendem staka buk. Waswe, olketa buk hia gud yet for iusim long preaching or olketa start for luk nogud? Sapos olketa gud yet, iumi mas mekem plan for givimaot long preaching. Iumi savve iusim olketa buk wea luk nogud for iumiseleva or torowem long gudfala wei. Nomata iumi garem offer evri month, samfala taem iumi savve iusim eni buk.
5 Iusim gudfala tingting evritaem long haomas buk nao iumi needim for preaching. Iumi savve keepim samfala buk long haos, bat no keepim staka tumas, bikos iumi savve tekem evritaem long Kingdom Hall. Long start long month, iu savve tekem samfala buk for offerim and sapos olketa gogo for finis, iu savve tekem samfala moa.
6 Pipol wea tinghae long trufala toktok long Bible nao savve kasem gudfala samting from olketa buk bilong iumi. Iumi evriwan mas iusim long gudfala wei olketa buk wea iumi kasem, mekem iumi showimaot iumi barava tinghae long olketa buk bilong iumi.