Hao for Gohed Strong
1 Strong wea Apollos garem for duim preaching hem mekem iumi tingim olketa Christian distaem wea barava strong for duim disfala waka. (Acts 18:24-28) Nomata olsem, Bible talem iumi evriwan for ‘no lesy for duim waka bilong iumi. Gohed strong for duim.’ (Rom. 12:11) Wanem nao savve helpem iumi for kasem and gohed strong for duim preaching waka?
2 Savve wea Mekem Iumi Gohed Strong: Bihaen Jesus showim hemseleva long tufala disaepol and “minim long olketa evri samting wea Moses and evri profet raetem abaotem hem insaed long olketa Holy Raeting,” tufala sei olsem: “Taem iumi wakabaot kam long road and hem minim kam olketa Holy Raeting long iumi, iumi hapi tumas, iaman?” (Luke 24:27, 32) Iumi tu savve barava hapi taem iumi minim gud go moa Bible! Tru nao, savve bae strongim faith bilong iumi. Romans 10:17 hem sei olsem: ‘Man garem faith from samting wea hem herem.’ Taem iumi barava trustim olketa promis bilong Jehovah, iumi laek tumas for storyim olketa samting wea iumi lanem!—Ps. 145:7; Acts 4:20.
3 Savve wea iumi kasem firstaem no savve strongim love bilong iumi for God and helpem iumi gohed strong for worshipim hem. Iumi mas gohed for lane moa abaotem olketa tru samting and strongim go moa love bilong iumi for Jehovah. Sapos nomoa, worship bilong iumi bae isisi kamap olsem samting nating nomoa. (Rev. 2:4) Bible strongim iumi for ‘gohed kasem stretfala savve bilong God.’—Col. 1:9, 10.
4 Wei Bilong Iumi for Study: Fitim diswan, iumi mas ting raonem gud wei bilong iumi for study. Tingim diswan, maet iumi andalaenem olketa ansa long Wastaoa study and talem olketa koment wea stret. Bat waswe, iumi readim tu olketa scripture and ting raonem hao nao datfala study savve helpem iumi? Waswe long Bible reading bilong iumi evri week, iumi trae hard for savve long samfala samting moa sapos iumi savve duim datwan, and for ting raonem olketa point wea savve helpem iumi long datfala Bible reading? (Ps. 77:11, 12; Prov. 2:1-5) Wei for ting raonem and tingting strong long toktok bilong God savve barava helpem iumi! (1 Tim. 4:15, 16) Wei for duim gudfala study olsem, bae helpem and strongim iumi for gohed “strong for duim olketa gudfala waka.”—Titus 2:14.