Helpem Pikinini Bilong Iu for Kamap Gud Go Moa for Preach
1 Olketa Christian mami and dadi garem bigfala waka for lanem pikinini bilong olketa for share long preaching start taem olketa smol yet. Samfala difren wei stap for duim diswan. Samfala pikinini savve baeheartim wanfala Bible scripture nomata olketa no savve read yet. Diswan savve mekem pipol for laek herem story. Taem olketa pikinini start for big, olketa savve lane for duim samfala samting moa long preaching. Wanem nao iufala olketa mami and dadi savve duim for helpem pikinini for preach long pipol? Olketa idea long hia savve helpem iufala.
2 Bihaen iu sei hello iu savve sei olsem:
◼ “Boy bilong mi, [talem nem], laek for readim wanfala naes scripture for iu.” Pikinini savve sei: “Long disfala scripture long Psalms, mi lanem nem bilong God. [Pikinini readim or baeheartim Psalm 83:18.] Olketa magasin hia storyim wanem Jehovah God bae duim for iumi. Waswe, iu laekem?” For finisim story, iu savve storyim hao donation nao sapotim waka bilong iumi evriwea long world.
3 Or iu savve sei olsem:
◼ “Hello. Mi lanem gele bilong mi, [talem nem], for tingim narafala pipol long community. Hem laek for storyim wanfala short Bible toktok witim iu.” Hem savve sei: “For helpem pipol, mi laek for storyim hope abaotem future wea stap long Bible. [Pikinini readim or baeheartim Revelation 21:4.] Olketa magasin hia storyim wanem Kingdom bilong God bae duim for iumi. Mi savve iu bae enjoyim.”
4 Wei for iusim isi wei for story evritaem, bae gogo helpem pikinini for no fraet for story abaotem Kingdom. Wei for practice witim olketa pikinini savve helpem olketa for story klia and big for man herem gud, mekem olketa savve story gud long olketa difren taem and ples. Wei for praisem and helpem olketa pikinini for prepare gud firstaem, datwan bae helpem olketa for talemaot faith bilong olketa.
5 Diskaen wei for helpem olketa pikinini mekem plande long olketa fit for kamap pablisa wea no baptaes. Iumi barava hapi for lukim olketa pikinini bilong iumi kamap gud go moa for preach!—Ps. 148:12, 13.