Waka Hard for Duim Moa Samting Long Ministry
1 Aposol Paul kaonselem olketa Christian for followim wei bilong God and for ‘gohed gud long disfala wei.’ (1 Thess. 4:1) Long wanem wei nao iumi savve duim datwan? Wanfala wei nao hem for iumi gohed trae hard for duim moa samting long spiritual waka bilong iumi, and evritaem waka hard for ‘barava duim gud ministry bilong iumi.’—2 Tim. 4:5.
2 Samting wea Muvim Iumi: Iumi duim moa samting long ministry bikos iumi laek for barava servem Creator. Iumi laek for gohed strong long spiritual wei and duim olketa samting for barava kamap gud long ministry. Wei for garem gudfala schedule and stretfala tingting bae helpem iumi for kasem olketa spiritual goal.—Ps. 1:1, 2; Phil. 4:6; Heb. 10:24, 25.
3 For duim moa samting long ministry, iumi mas willing for sakrifaesim samfala samting. Iumi savve duim olsem taem iumi prea and ting raonem nambawan example bilong Jesus. (Matt. 20:28) Long ministry bilong Jesus, samting wea mekem hem barava hapi nao hem wei for helpem narawan. (Acts 20:35) Iumi savve followim example bilong Jesus long wei for interest long pipol and iusim olketa chance wea kamap for duim moa samting long ministry.—Isa. 6:8.
4 Waka Bilong Parents: From training wea parents givim long pikinini taem olketa smol yet, datwan savve helpem pikinini for barava laek helpem narawan and duim moa samting long ministry. Olketa young wan bae luksavve olketa narawan long famili waka hard and duim moa samting long ministry. From wanfala brata gogo witim grandadi bilong hem for duim olketa Kingdom waka taem hem smol, datwan barava muvim hem for laek duim moa samting. From hem lukim grandadi bilong hem waka hard and hapi, datwan muvim hem for lukaotem olketa chance for helpem olketa Christian brata and sista. Distaem hem wanfala ministerial servant.
5 Kongregeson Needim Olketa Brata: “Sapos eni man laek duim waka for hem kamap overseer, gudfala waka nao hem laek for duim.” (1 Tim. 3:1) Disfala toktok encouragem olketa brata for waka hard mekem olketa kasem mark for garem samfala privilege moa insaed organization bilong Jehovah. For duim olketa privilege hia, man no needim spesol savve. Brata wea laek for kasem samfala privilege mas showimaot long laef bilong hem hao Kingdom hem first samting and hem strong for duim ministry. (Matt. 6:33; 2 Tim. 4:5) Hem mas trae hard for showimaot gudfala example for olketa narawan.
6 Evriwea Long World: Jehovah hem mekem disfala waka for hipimap pipol for gohed kwiktaem. (Isa. 60:22) Hem important tumas for evriwan wea followim example bilong Jesus for barava duim gud ministry bilong olketa. Report for 2008 service year showimaot 289,678 nao baptaes. Datwan hem samting olsem 794 niu wan olketa baptaes evriday! Hem gud for iumi evriwan lukaotem chance for duim moa samting long ministry bilong iumi.