Man Kasem Blessing Taem Hem Willing for Help
1. Hao nao David and Nehemiah showimaot tufala willing for help?
1 Taem Goliath tok spoelem army bilong Israel, eni soldia nomoa savve go faetem hem. Bat wanfala boy wea no kasem eni training for faet long war and wea lukaftarem sheepsheep nao willing for go faetem hem. (1 Sam. 17:32) Taem olketa Jew wea stap long Babylon go bak long Jerusalem, olketa nating buildim bak wall bilong Jerusalem. Gogo, wanfala man wea waka for givim drink long king bilong Persia nao willing for lusim datfala naes waka insaed haos bilong king, and hem go long Jerusalem for lukaftarem datfala waka for buildim wall. (Neh. 2:5) Jehovah blessim David and Nehemiah, bikos tufala willing for help.—1 Sam. 17:45, 50; Neh. 6:15, 16.
2. Why nao olketa Christian shud willing for helpem narawan?
2 Distaem, plande pipol no willing for helpem narawan. From iumi stap long “olketa last day,” evritaem pipol busy tumas, and plande “lovem olketa seleva” nomoa. (2 Tim. 3:1, 2) Hem isi tumas for man busy for aftarem samting wea hemseleva laekem, gogo, hem no wari nao for helpem narawan wea garem need. Bat from iumi olketa Christian, iumi laek followim Jesus for lukaotem chance for helpem narawan. (John 5:5-9; 13:12-15; 1 Pet. 2:21) Hao nao iumi savve showimaot iumi willing for helpem narawan, and wanem blessing nao iumi bae kasem?
3. Hao nao iumi savve showimaot iumi willing for help long olketa kongregeson meeting?
3 Helpem Olketa Brata and Sista: Iumi savve ‘helpem narawan fren witim God’ taem iumi willing for ansa long meeting. (Rom. 1:11) Wei for ansa hem showimaot respect long Jehovah, hem mekem truth kamap moa strong long mind and heart bilong iumi, and hem mekem iumi barava enjoyim olketa meeting. (Ps. 26:12) Iumi savve willing tu for givim tok long Theocratic Ministry Skul sapos olketa needim volunteer. Diswan bae helpem iumi for gohed kamap gud long wei for teach.
4. Wanem nao olketa nara wei for showimaot iumi willing for help?
4 Olketa brata savve showimaot olketa willing for help taem olketa waka hard for kasem olketa responsibility insaed kongregeson. (Isa. 32:2; 1 Tim. 3:1) Evriwan savve help for mekem olketa assembly and convention gohed gud long wei for volunteer for waka long eni department. Taem iumi volunteer for waka witim traveling overseer long ministry or invaetem hem for kaikai, iumi bae kasem gud samting from wei for “strongim” iumi evriwan. (Rom. 1:12) Taem iumi willing for helpem olketa pikinini wea no garem dadi, olketa widow, olketa wea sik and olo, olketa mami wea garem olketa smol pikinini, and olketa narawan long kongregeson, iumi bae hapi and Jehovah tu bae hapi long iumi.—Prov. 19:17; Acts 20:35.
5. Wanem nao samfala waka long Kingdom Hall wea iumi savve volunteer for duim?
5 Nara samting wea iumi savve duim nao hem for willing for iusim taem and strong bilong iumi for klinim and keepim gud Kingdom Hall. And tu, from staka pipol kam distaem for worshipim Jehovah, bigfala need stap for garem olketa niu Kingdom Hall and for volunteer for buildim olketa Kingdom Hall hia. Wanfala hasband and waef talem Regional Building Komiti long ples bilong olketa hao tufala willing for help nomata tufala no savve hao for wakem haos. Gogo, tufala kasem training and distaem tufala savve hao for leim olketa brik. Waef hia hem sei: “Wei wea mifala waka tugeta witim olketa narawan hem mekem mifala barava fren gud tugeta. Long evening mifala savve feel taed fogud, bat long spiritual wei mifala strong.”
6. Long wanem wei nao ministry hem nambawan volunteer waka wea iumi savve duim?
6 Taem Iumi Preach: Volunteer waka wea barava nambawan nao hem for iumi preach abaotem Kingdom. Taem iumi helpem pipol for minim and followim kaonsel from Bible, laef bilong olketa bae garem mining and olketa bae strong for lusim olketa rabis wei. Olketa lane abaotem spesol hope for future wea Bible storyim. Taem iumi teachim pipol abaotem Bible, iumi duim wanfala volunteer waka wea bae mekem iumi hapi, and hem helpem pipol kasem gud samting for olowe. (John 17:3; 1 Tim. 4:16) Maet iumi fit for duim moa samting insaed disfala waka, olsem wei for auxiliary or regular pioneer, muv go long ples wea needim samfala moa pablisa, or for lanem nara languis.
7. Why nao wei for volunteer hem important tumas distaem?
7 King David talem profesi abaotem taem wea Messiah bae start for rul, and hem sei long datfala taem pipol bilong God bae willing for “givim olketa seleva.” (Ps. 110:3.) From Jehovah mekem disfala spiritual harvest waka wea gogo for finis muv ahed kwiktaem, bigfala waka stap yet for eniwan wea laek volunteer. (Isa. 60:22) Waswe, iu sei: “Mi long hia! Sendem mi”? (Isa. 6:8) Tru nao, taem iumi showimaot iumi willing for help, iumi mekem Jehovah hapi and iumi bae kasem olketa nambawan reward.