Waswe, Mi Duim Inaf Samting Long Preaching Waka?
1. Wanem nao wanfala faithful Christian savve wari abaotem?
1 Waswe, enitaem iu askem datfala kwestin? Maet distaem iu no go tumas long preaching waka from iu gogo for olo, iu garem problem saed long health, or iu garem staka waka long famili for duim, and datwan mekem iu for wikdaon. Wanfala sista wea garem thrifala pikinini sei, samfala taem hem feel olsem wanem hem duim long preaching waka hem no inaf, bikos hem iusim taem and strong wea hem garem for lukaftarem famili bilong hem. Wanem nao bae helpem iumi for garem stretfala tingting abaotem waka wea iumi duim?
2. Wanem nao Jehovah askem iumi for duim?
2 Wanem Jehovah Laekem Iumi for Duim: Tru tumas, iumi evriwan laek for duim staka samting long preaching waka. Bat staka taem, wanem iumi laek for duim hem difren from wanem iumi savve duim. From iumi laek duim staka samting, datwan showimaot iumi no satisfae long wanem iumi fit for duim. Iumi shud tingim, Jehovah savve long wanem iumi fit for duim and hem no askem iumi for duim wanem iumi no savve duim. (Ps. 103:13, 14) Wanem nao hem askem iumi for duim? Hem laekem iumi for worshipim hem long full soul bilong iumi, hem nao for duim best bilong iumi.—Col. 3:23.
3. Wanem nao iumi savve duim for lukluk gud long waka bilong iumi for preach?
3 Wanem nao bae helpem iumi for disaedem wanem iumiseleva savve duim? Iumi savve askem Jehovah for helpem iumi luksavve long wanem iumi savve duim. (Ps. 26:2) Iumi savve askem wanfala Christian fren wea iumi trustim and hem no fraet for talem wanem iumi need for duim for kamap gud long samfala samting. (Prov. 27:9) Tingim tu, living bilong iumi savve change, so hem gud for lukluk gud evritaem long iumiseleva.—Eph. 5:10.
4. Wanem nao tingting bilong iumi long olketa reminder wea kam from Bible abaotem preaching waka?
4 Tingting Bilong Iumi Abaotem Olketa Reminder: Long taem bilong wanfala resis, pipol wea lukluk savve singaot for sapotim olketa wea ranran. Olketa duim olsem for helpem olketa wea ranran for kasem goal, and no for tok daonem olketa. Long sem wei, olketa toktok and reminder wea iumi herem long olketa meeting and readim long olketa buk bilong iumi wea kam from Bible hem helpem iumi for ‘preach and gohed strong for duim datwan,’ and no for mekem iumi feel olsem iumi no fit. (2 Tim. 4:2) Iumi sure taem iumi gohed for duim best bilong iumi, Jehovah bae tingim and hapi long ‘love and waka’ wea iumi duim.—Heb. 6:10.