‘Gudfala Samting Man Duim Showimaot Hem Garem Gudfala Tingting’
1. Wanem nao tingting bilong samfala abaotem waka wea iumi duim?
1 Samfala taem, maet iumi meetim haosholder wea no laek for lisin from olketa no minim gud iumi, or olketa herem samfala laea story abaotem Olketa Jehovah’s Witness. Maet tingting bilong olketa hem followim rong samting wea kamaot long radio, niuspepa, and TV. Long samfala ples olketa sei, iumi olketa ‘dangerous pipol.’ Wanem nao iumi shud duim taem pipol talem olketa kaen toktok olsem?
2. Wanem nao bae helpem iumi for no feel nogud taem pipol againstim iumi?
2 Garem Gudfala Tingting: Long first century, staka taem pipol no minim gud and tok againstim Jesus and pipol bilong Jehovah. (Acts 28:22) Bat olketa no letem kaen toktok olsem for stopem olketa for duim preaching waka. Jesus hem sei: “Olketa gudfala samting wea man duim nao showimaot hem garem gudfala tingting.” (Matt. 11:18, 19) Jesus gohed strong for duim wanem Dadi bilong hem laekem, and hem savve olketa wea lukaotem truth bae followim gud nius wea olketa herem. Taem iumi savve pipol spoelem Son bilong God, datwan bae mekem iumi for no feel nogud.
3. Why nao iumi shud no sapraes taem pipol talem laea story and againstim iumi?
3 Jesus talem finis, pipol long world bae heitim olketa wea followim hem long sem wei olsem olketa heitim hem. (John 15:18-20) Dastawe, iumi shud no sapraes taem pipol talem laea story and againstim iumi distaem. So iumi savve, kaen samting olsem bae gohed kamap big taem iumi go klosap long end bilong olketa last day, and taem Satan kros go moa. (Rev. 12:12) Iumi hapi long diswan bikos iumi savve world bilong Satan klosap for finis.
4. Wanem nao iumi shud duim sapos iumi meetim pipol wea no laek lisin long iumi?
4 Tok Kaen Long Pipol: Taem pipol no laek lisin long iumi, evritaem iumi shud tok kaen and no raf long olketa. (Prov. 15:1; Col. 4:5, 6) Sapos fitim, iumi savve explainim long haosholder hao staka laea story nao olketa talem abaotem Olketa Jehovah’s Witness or askem why hem ting olsem. Taem iumi no tok raf, datwan maet mekem datfala haosholder for changem tingting bilong hem abaotem Olketa Jehovah’s Witness and lisin taem nara witness visit kam. Bat sapos haosholder hem kros fogud, maet hem gud for lusim hem long gudfala wei. Iumi savve hao nomata wanem tingting nao olketa narawan garem abaotem iumi, Jehovah tinghae long preaching waka wea iumi duim.—Isa. 52:7.