Wanfala Niu Brochure for Offerim!
1. Wanem nao bae iumi offerim long month bilong November, and olketa wakem disfala brochure for wanem?
1 Long 2009 “Gohed for Lukaot!” Distrik Convention, wanfala niu brochure hem release wea garem title The Bible—What Is Its Message? Long month bilong November, hem firstaem for olketa kongregeson evriwea long world for offerim disfala brochure. Hao nao pipol long territory bae kasem gud samting from disfala brochure? Staka pipol, main wan nao olketa religion wea no Christian, olketa no savve gud long Bible. Dastawe, long page 3 hem explainim hao disfala brochure hem storyim “olketa main samting insaed long Bible.”
2. Hao nao iumi savve offerim disfala brochure?
2 Hao for Offerim: Iumi savve sei olsem: “Mifala laek savve long tingting bilong iu abaotem disfala scripture. [Readim 2 Timothy 3:16.] Staka pipol wea mifala story witim olketa agree witim olketa toktok hia, olketa narawan tingse Bible hem buk nating nomoa. Wanem nao tingting bilong iu abaotem Bible? [Weit for hem ansa.] Nomata wanem biliv nao iumi garem, hem gud for iumiseleva lukim wanem Bible talem. [Readim firstfala paragraf wea stap antap long page 3.] Taem iu readim disfala brochure abaotem olketa barava spesol toktok long Bible, bae iu savve long wanfala interesting samting: Bible hem garem wanfala main theme and message.”
3. Wanem nao nara idea for offerim disfala brochure sapos iumi preach long pipol long olketa religion wea no Christian?
3 Diswan hem nara idea sapos iumi preach long pipol long olketa religion wea no Christian: “Mifala laek for savve long tingting bilong iu long samting wea disfala scripture talem (or long disfala holy buk). [Readim Psalm 37:11.] Iu tingse earth bilong iumi bae hao taem disfala profesi hem kamap tru? [Weit for hem ansa.] Diswan hem example abaotem comfort and hope wea pipol from evri difren kantri and religion savve kasem from Bible.” Readim paragraf wea stap antap long page 3, and offerim brochure.
4. Hao nao iumi savve iusim disfala brochure for startim Bible study?
4 Startim Bible Study: Taem iumi go bak, remindim haosholder long wanem iumi storyim bifor and ting raonem wan or tufala paragraf long subject wea iumi storyim finis, and iusim olketa kwestin wea stap long end bilong section wea iumi chusim. Or sapos iumi laek for storyim Wanem Bible Teachim buk, iumi savve readim long hem last page bilong datfala brochure, givim hem buk, askem which chapter title nao hem interest long hem, and iutufala storyim wan or tufala paragraf from datfala chapter. Hem gud for iumi evriwan duim best for offerim disfala brochure long month bilong November!