“Haomas Hour Nao Mi Savve Kaontem?”

Waswe, enitaem iu askem datfala kwestin? Samfala instruction hem stap long Organized buk long page 86-87. Samfala taem iumi kasem samfala nara instruction tu. Wanfala example nao long Kwestin Box bilong September 2008 Kingdom Ministry Bilong Iumi. Bat organization bilong Jehovah no givim rul for evri samting wea savve happen. Dastawe hem no fitim for olketa elder or olketa narawan for mekem samfala extra rul.

Sapos wanfala pablisa garem kwestin bat no eni pablikeson story abaotem datwan, hem savve ting raonem tufala kwestin hia: Waswe, mi iusim full taem hia for duim ministry? Or waswe, mi iusim taem hia for duim difren samting wea no join witim ministry? Wanem iumi raetem long field service report evri month shud mekem iumi hapi and no pokem konsens bilong iumi. (Acts 23:1) Bat main samting nao hem no wanem iumi kaontem long ministry, hem for iusim gud taem bilong iumi long ministry.—Heb. 6:11.