Kwestin Box

◼ Hao long nao iumi shud study witim wanfala Bible study wea gohed gud?

Gohed study witim wanfala Bible study wea gohed gud go kasem taem hem finisim tufala buk hia, Wanem Nao Really Samting wea Bible Teachim? and “Gohed Kasem Gud Samting From Love Bilong God.” Iumi shud gohed for studyim tufala buk hia witim Bible study nomata hem baptaes finis. Bihaen hem baptaes, iumi savve gohed for reportim haomas hour, haomas taem iumi duim return visit, and datfala study. Sapos wanfala pablisa hem kam joinim study and tekpart, hem savve reportim tu haomas hour long study.—Lukim April 2012 Kingdom Ministry Bilong Iumi, page 2.

Hem important for olketa niu wan minim gud olketa tru samting wea Bible teachim bifor iumi finis for study witim olketa. Olketa need for “strong” long faith wea olketa garem long Christ, and need for “olsem wanfala tree wea rut bilong hem stap deep insaed long graon” mekem olketa savve winim eni hard samting wea olketa bae feisim. (Col. 2:6, 7; 2 Tim. 3:12; 1 Pet. 5:8, 9) And tu, olketa mas “garem stretfala savve abaotem olketa tru teaching” mekem olketa savve teachim gud olketa narawan. (1 Tim. 2:4) Taem iumi studyim tufala buk hia witim olketa Bible study bilong iumi, iumi helpem olketa for wakabaot gud long ‘datfala road for kasem laef.’—Matt. 7:14.

Bifor olketa elder appruvim samwan for baptaes, olketa shud mek sure hem minim gud olketa main teaching insaed Bible and followim olketa teaching hia. Olketa elder shud ting raonem gud sapos wanfala Bible study no finis yet for studyim firstfala buk. Sapos samwan hem no redi yet for baptaes, olketa elder bae mek sure hem kasem help mekem hem kamap fit for baptaes.—Lukim Organized to Do Jehovah’s Will, page 217-218.

[Blurb long page 2]

Hem important for olketa niu wan minim gud olketa tru samting wea Bible teachim