Waswe, Iu ‘Hapi Long Wanem Iu Duim’?
1. Why nao iumi shud hapi long wanem iumi duim evri month?
1 Hem kasem end long month and hem taem for givim field service report. Waswe, iu ‘hapi long wanem iu duim’ long ministry? (Gal. 6:4) Iumi evriwan shud hapi taem iumi duim best bilong iumi long ministry, nomata sapos iu wanfala spesol pioneer wea reportim 130 hour or iu wanfala pablisa wea insaed datfala spesol arrangement for olketa wea savve reportim 15 minute.—Ps. 100:2.
2. Why nao iumi shud duim best bilong iumi long ministry?
2 From Jehovah hem Lord bilong evri samting, hem fit for kasem best samting wea iumi savve givim. (Mal. 1:6) Iumi dedicate long Jehovah for duim wanem hem laekem bikos iumi lovem hem. So long end bilong day or month, sapos iumi iusim gud taem, savve, and strong bilong iumi long ministry, then iumi savve hapi long wanem iumi duim. (Prov. 3:9) Bat sapos iumi savve iumi shud duim moa samting, then iumi shud ting raonem wanem for duim.—Rom. 2:15.
3. Why nao hem no stret for comparem wanem iumi duim witim wanem narawan duim?
3 ‘No Comparem Wanem Iumi Duim Witim Wanem Narawan Duim’: Hem no stret for comparem iumi witim olketa narawan or for comparem wanem iumi savve duim distaem witim taem iumi strong yet. Laef bilong iumi savve change and wanem iumi fit for duim hem no semsem witim narawan. Sapos man comparem hemseleva witim narawan, datwan savve mekem hem for laek winim narawan or mekem hem feel iusles. (Gal. 5:26; 6:4) Jesus no comparem wanem man duim witim narawan, bat hem praisem man for wanem hem fit for duim.—Mark 14:6-9.
4. Wanem nao iumi lanem from tokpiksa bilong Jesus abaotem olketa silver selen?
4 Jesus storyim tokpiksa abaotem wanfala boss wea givim olketa wakaman bilong hem olketa silver selen “followim wanem olketa fit for duim.” (Matt. 25:15) Taem datfala boss kam bak, hem askem wanem nao olketa duim witim datfala selen. Olketa wakaman wea duim best bilong olketa followim wanem olketa fit for duim, boss hem praisem olketa and evriwan hapi nao. (Matt. 25:21, 23) Taem iumi duim best bilong iumi long ministry, iumi savve sure God hem hapi long iumi and iumi hapi long wanem iumi duim!