Wanem Nao Mekem Iumi Laek for Preach?
1. Wanem nao mekem iumi laek for talemaot gud nius abaotem Kingdom?
1 Barava important waka wea iumi savve duim distaem hem nao for talemaot gud nius abaotem Kingdom bilong God. Taem iumi duim preaching waka iumi showimaot iumi obeyim tufala law wea winim eni nara law. Hem nao for lovem Jehovah and for lovem narawan. (Mark 12:29-31) Sapos iumi lovem Jehovah and olketa narawan datwan bae strongim iumi for duim preaching waka.—1 John 5:3.
2. Wanem nao iumi savve duim for showimaot iumi lovem Jehovah?
2 Lovem Jehovah: Sapos iumi lovem Jehovah, bae iumi laek for defendim hem. Satan laea for spoelem God for samting olsem 6,000 year finis. (2 Cor. 4:3, 4) Datwan mekem pipol tingse God hem wanfala Trinity, God mekem pipol wea sin for safa long hell fire, and hem no tingim olketa man. Staka pipol tingse God hem no stap. Iumi barava laekem pipol for savve tru samting abaotem Jehovah! Taem iumi strong for duim ministry, datwan mekem God hapi and spoelem olketa plan bilong Satan.—Prov. 27:11; Heb. 13:15, 16.
3. Wanem nao iumi savve duim for showimaot iumi lovem olketa narawan?
3 Lovem Narawan: Evritaem iumi preach long pipol datwan showimaot iumi lovem olketa. From evri samting hem hard tumas distaem, pipol barava need for herem gud nius abaotem Kingdom. Staka pipol olketa olsem pipol long Nineveh long taem bilong Jonah wea “no savve long wanem hem stret and wanem hem no stret.” (Jonah 4:11) Gud nius wea iumi preachim savve helpem pipol for hapi and garem gudfala laef. (Isa. 48:17-19) Hem givim hope long olketa. (Rom. 15:4) Sapos olketa duim samting followim wanem olketa herem, olketa bae “sev.”—Rom. 10:13, 14.
4. Wanem nao bae Jehovah no forgetim?
4 Olketa gudfala pikinini evritaem laek for duim samting for showimaot olketa lovem mami and dadi bilong olketa. Sapos iumi lovem God and olketa narawan bae iumi no preach nomoa long taem wea kongregeson markem, bat iumi evritaem lukaotem chance for preach long pipol. Iumi bae gohed for preach. (Acts 5:42) Jehovah bae no forgetim love wea iumi showimaot for hem and olketa narawan.—Heb. 6:10.