Leta From Governing Body

For Iufala wea Waka Witim Mifala:

Mifala hapi for raet kam long iufala long start bilong disfala important year! Long klosap end bilong disfala year 2014, King Jesus Christ bae hem rul midolwan long olketa enemy bilong hem for 100 year finis.​—Ps. 110:1, 2.

Long annual meeting bilong Watch Tower Bible and Tract Society of Pennsylvania wea kamap long start bilong 2014 service year, New World Bible Translation Committee releasem revised English New World Translation. Datfala Bible hem wanfala nambawan transleison. Jehovah iusim olketa anointed Christian for transleitim New World Translation wea iumi iusim bifor. (Rome 8:15, 16) Datwan nao mekem New World Translation and revised New World Translation barava spesol, iaman?

For staka year, Raeting Komiti bilong Governing Body luksavve hem important for transleitim Bible long olketa difren languis. Distaem, man savve kasem full New World Translation or part long datwan long 121 languis. Mifala encouragem iu for readim and ting raonem Bible evriday for showimaot long Jehovah iu barava tinghae long Bible. Taem iu duim olsem, iu bae fren gud witim Jehovah God wea givim kam Bible.​—Jas. 4:8.

Mifala sorre taem mifala herem samfala brata and sista bilong iumi kasem hard taem. Datwan savve mekem olketa feel sorre. Olsem example, wanfala famili long Asia seke taem mami bilong olketa kasem sik wea mekem full body bilong hem paralaes. Olketa doctor no savve duim eni samting for finisim datfala sik. Datwan hem barava sorre samting! Distaem hasband mas lukaftarem waef bilong hem day and naet. Son and tufala dota long datfala famili barava helpem dadi and mami bilong olketa. Famili hia and iufala wea gohed faithful nomata iufala kasem enikaen hard taem savve hapi from iufala lane for no givap. (Jas. 1:2-4) Jehovah promisim olketa anointed Christian and olketa nara sheepsheep olketa wea no givap bae hapi bikos olketa bae kasem laef olowe!​—Jas. 1:12.

Last year, 19,241,252 pipol kam long Memorial. Iumi hapi tumas for lukim staka pipol tinghae long Jehovah and Jesus Christ taem olketa kam long disfala important hipap for iumi pipol bilong Jehovah! From iumi tinghae long dae bilong Jesus, staka million brata and sista mekhae long Jehovah taem olketa duim auxiliary pioneer waka long March and April. Datwan hem barava gud samting! And iumi hapi for savve olketa wea auxiliary pioneer long taem wea circuit overseer hem visit olketa savve joinim full meeting bilong olketa pioneer, nomata circuit overseer visit long olketa nara month. Iumi luksavve hem important for busy long preaching waka and for go long olketa meeting evritaem. Datwan bae helpem iumi for faithful and gohed strong, and no letem Satan for mekem iumi wikdaon or spoelem faith bilong iumi.​—1 Cor. 15:58.

Iumi hapi for savve long last service year, 277,344 nao showimaot olketa dedicate finis taem olketa baptaes and joinim iumi for wakabaot long road wea lead go long laef! (Matt. 7:13, 14) Hem gud for iumi helpem olketa for “gohed for garem bigfala faith.” (Col. 2:7) Gohed for encouragem each other for no givap go kasem taem world hem finis. (Matt. 24:13) Iumi mas “comfortim olketa wea sorre, helpem olketa wea wik, and patient long evriwan.” (1 Thess. 5:14) And tu, iumi “mas prea evritaem” and talem Jehovah iumi ‘laekem Kingdom bilong hem for kam.’​—1 Thess. 5:17; Matt. 6:10.

Mifala hope iufala kasem staka gud samting taem iu readim 2014 Yearbook. Mifala lovem iufala evriwan wea lovem Jehovah!

Olketa brata bilong iufala,

Governing Body Bilong Olketa Jehovah’s Witness