Leta From Governing Body

Dear Olketa Brata and Sista:

“Long evritaem wea mifala prea for iufala evriwan, mifala thankiu long God. Taem mifala prea long God wea hem Dadi bilong iumi, mifala evritaem tingim waka wea iufala duim from iufala garem faith, and evri hard waka wea iufala duim bikos long love bilong iufala. Mifala tingim tu wei wea iufala no givap from iufala hope long Lord bilong iumi Jesus Christ.” (1 Thess. 1:2, 3) Toktok long disfala scripture hem showimaot feeling wea mifala garem for iufala! Mifala barava tinghae long iufala and thankiu long Jehovah for gudfala waka wea iufala duim.

Long last year, faith and love bilong iufala mekem iufala waka hard for sapotim Kingdom. Staka long iufala duim moa samting long ministry. Samfala long iufala muv go long olketa nara ples, or long nara kantri, wea needim samfala pablisa moa. Olketa narawan duim pablik witnessing. Staka duim auxiliary pioneer waka long taem bilong Memorial, long month wea circuit overseer visitim kongregeson, or long datfala spesol campaign wea kamap long August 2014. Nomata living bilong iufala hem no semsem, mifala luksavve iufala evriwan duim waka bilong Jehovah witim full heart bilong iufala, and mifala praisem iufala for datwan. (Col. 3:23, 24) Mifala thankiu long Jehovah for “waka wea iufala duim”!

Mifala barava tinghae tu long wei wea iufala sapotim olketa difren construction waka wea gohed raonem world. Iumi barava needim olketa building hia bikos staka pipol nao kam insaed organization bilong Jehovah distaem. (Isa. 60:22) Tingim diswan: Long year wea go pas, peak pablisa hem 8,201,545, and average namba bilong olketa Bible study evri month hem 9,499,933. From diswan, iumi need for extendim or renovatim staka branch office. And tu, iumi needim staka Kingdom Hall moa! Nara samting tu, long staka ples, iumi needim olketa remote transleison office mekem olketa transleita savve stap and waka long ples wea pipol iusim languis wea olketa transleitim.

So hem gud for ting raonem wanem iumi wanwan savve duim for sapotim construction waka wea gohed raonem world. Maet samfala long iumi savve waka long olketa construction project hia. And iumi evriwan savve givim contribution for sapotim olketa important project hia. (Prov. 3:9, 10) Taem olketa Israelite wakem tabernacle, olketa willing tumas for givim contribution. From olketa givim staka samting, gogo Moses talem announcement for olketa no tekem kam eni samting moa. (Ex. 36:5-7) Example bilong olketa mekem iumi tu laek for sapotim waka bilong Jehovah. Mifala thankiu long Jehovah for evri samting wea iufala duim for sapotim olketa important waka hia!

Taem iumi tingim olketa brata bilong iumi wea gohed faithful nomata olketa kasem hard taem, datwan mekem iumi barava hapi. Olsem example, tingim olketa brata bilong iumi long South Korea. Start kam long 1950, gavman bilong datfala kantri putim staka young brata bilong iumi long prison bikos olketa no willing for joinim army. Staka brata bilong iumi nao gohed faithful nomata olketa stap long prison. Example bilong olketa strongim iumi for gohed faithful tu!

Long Eritrea, olketa putim samfala brata and sista, and samfala pikinini tu, long prison. Thrifala long olketa brata nao stap long prison for winim 20 year finis. Nomata organization bilong Jehovah duim staka samting for mekem gavman releasem olketa, kam kasem distaem olketa stap yet long prison. Nomata olsem, olketa brata and sista hia gohed faithful and no givap long hard taem wea olketa kasem. Iumi shud evritaem prea for olketa faithful wan hia.—Rome 1:8, 9.

Hem tru, staka long iufala no stap long prison. Bat staka long iufala mas deal witim wei for olo, problem saed long health, wei wea marit partner or relative againstim iu, and samfala nara hard taem wea maet iu nomoa savve abaotem. Nomata olsem, iufala gohed faithful for worshipim Jehovah! (Jas. 1:12) Datwan hem gud tumas. Mifala thankiu long Jehovah for wei wea iufala gohed faithful and no givap.

Tru tumas, taem mifala tingim wei wea iufala faithful, showimaot love, and no givap taem iufala kasem hard taem, mifala garem staka reason for “talem thankiu long Jehovah, bikos hem gudfala God.” (Ps. 106:1) Mifala lovem iufala evriwan, and mifala prea long Jehovah for strongim iufala, lukaftarem iufala, and blessim iufala mekem iufala savve worshipim hem for olowe.

Olketa brata bilong iufala,

Governing Body Bilong Olketa Jehovah’s Witness