Kwestin Box

◼ Why nao hem danger samting for associate witim samwan long Internet wea iumi no savve long hem?

Samfala website long internet olketa wakem for pipol savve meetim and story witim olketa narawan. Man savve putim piksa and information abaotem hemseleva long profile bilong hem long olketa website hia. Then pipol wea lukim profile hia savve contactim hem. Olketa young pipol barava laekem kaen website olsem, and samfala young wan long kongregeson iusim olketa website hia for story witim olketa narawan wea sei Olketa Jehovah’s Witness.

Hem isi for samwan wea iumi meetim long Internet for laea abaotem hu nao hem, spiritual saed bilong hem, or why nao hem laek for story witim iumi. (Ps. 26:4) Maet samwan wea sei hem wanfala Jehovah’s Witness hem no Witness, or hem disfellowship, or maet hem wanfala apostate tu. (Gal. 2:4) Luk olsem staka nogud man wea savve spoelem pikinini olketa iusim kaen website olsem for faendem pikinini for spoelem.

Nomata sapos iu sure man wea iu story witim long internet hem wanfala strong pablisa, hem isi for story bilong iutufala for go difren. Diswan hem bikos pipol savve feel free for storyim eni samting witim samwan long internet wea olketa no meetim. Maet olketa tingse wanem olketa storyim long internet hem secret, and no eni narawan bae savve abaotem datwan, olsem mami and dadi or olketa elder tu. Sorre samting nao, staka young Christian foldaon long disfala trap and start for talem rabis toktok long narawan long internet. (Eph. 5:3, 4; Col. 3:8) Samfala narawan uploadim long profile bilong olketa samfala nogud piksa bilong olketa seleva, iusim nem wea mekem nara pipol garem dirty tingting, or uploadim olketa link bilong music clip wea mekhae long sex.

Bikos long evri danger samting hia, dadi and mami shud chekim evritaem wanem nao pikinini bilong olketa duim long computer. (Prov. 29:15) Hem bae danger samting for invaetem wanfala stranger for kam stap long haos bilong iumi, or for letem hem stap seleva witim olketa pikinini bilong iumi. Olsem tu, hem danger samting for iumi or olketa pikinini bilong iumi for associate witim olketa stranger long Internet, nomata olketa wea sei olketa Witness tu.—Prov. 22:3.