‘No Followim Samting Iu Lukim, Bat Showimaot Iu Garem Faith’

No longtaem bifor army bilong Rome attakim and distroem Jerusalem, aposol Paul sei olketa Christian, wea olsem olketa “gudfala soldia bilong Christ,” mas redi for olketa hard samting wea bae kasem olketa and mas no tinghae tumas long olketa material samting. (2 Tim. 2:3, 4) From God hem klosap for finisim disfala nogud world bilong Satan, iumi mas garem strongfala faith mekem iumi gohed for duim wanem God laekem. (2 Cor. 4:18; 5:7) Lukim datfala English video ‘Walk by Faith, Not by Sight.’ (Go long jw.org, then clickim PUBLICATIONS > VIDEOS.) Lukim wei wea Naham and Abital tinghae tumas long olketa material samting and datwan barava spoelem tufala. Then bihaen iu lukim video, ansarem olketa kwestin hia:

(1) Wanem nao “datfala rabis samting wea . . . standap long ples wea holy” long first century, and wanem nao olketa Christian wea stap long Jerusalem mas duim? (Matt. 24:15, 16) (2) Why nao olketa Christian mas garem faith mekem olketa savve lusim Jerusalem? (3) Wanem nao olketa Christian mas lusim bihaen taem olketa ranawe from Jerusalem? (4) Why nao Naham and Abital no kwiktaem for ranawe? (Matt. 24:17, 18) (5) Wanem nao nara samting wea mekem hem no isi for Rachel ranawe? (Matt. 10:34-37; Mark 10:29, 30) (6) Wanem nao showimaot Ethan hem garem strongfala faith and hem barava trustim Jehovah? (7) Wanem nao olketa hard samting wea olketa Christian kasem taem olketa stap long Pella? (8) Wanem nao mekem Naham and Abital for no garem strongfala faith? (9) Wanem nao Jehovah duim for lukaftarem olketa Christian long Pella? (Matt. 6:33; 1 Tim. 6:6-8) (10) Taem end bilong disfala world hem kakam klosap, hao nao iumi savve followim example bilong Abraham and Sarah? (Heb. 11:8-10) (11) Wanem nao mekem Naham and Abital disaed for go bak long Jerusalem, and why nao tufala no garem stretfala tingting? (Luke 21:21) (12) Wanem nao happen long Jerusalem taem Naham and Abital go bak long there? (13) Why nao iumi mas strongim faith bilong iumi distaem, bifor disfala nogud world hem finis?—Luke 17:31, 32; 21:34-36.

Iumi showimaot iumi garem faith taem iumi (1) trustim direction wea kam from Jehovah, (2) followim wanem Jehovah talem, and (3) showimaot iumi tinghae long olketa spiritual samting winim olketa material samting. Iumi laek for evritaem showimaot iumi garem faith hao disfala “world bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.”—1 John 2:17.