Vision wea Strongim Faith

9:1-7

Taem thrifala aposol lukim vision wea lukluk bilong Jesus change, olketa herem Jehovah talemaot hem hapi long Jesus. Masbi Jesus hapi tumas for herem datwan. Diswan strongim Jesus for feisim olketa hard samting wea hem bae kasem. And tu, datfala vision barava strongim Peter, James, and John. Vision hia pruvim Jesus nao hem Messiah and hem important for olketa duim wanem hem talem. Samting olsem 32 year bihaen, Peter no forgetim datfala vision and hao datwan strongim faith bilong hem long “olketa profesi.”—2Pe 1:16-19.

Nomata iumi no lukim datfala vision, iumi lukim wei wea hem kamap tru. Distaem, Jesus hem rul and hem King wea garem bigfala paoa. Klosap nao hem bae “go for winim olketa enemy bilong hem,” and then niu world bae kamap wea evri samting hem raeteous.—Re 6:2.

Taem iu lukim olketa profesi long Bible kamap tru, hao nao datwan strongim faith bilong iu?