Olketa Young Wan, Iufala “Strong for Duim Olketa Gud Samting”

Aposol Paul raetem leta for Titus and talem hem and olketa nara young man for traem best for “showimaot gudfala example long evri samting wea [olketa] duim.” (Tit 2:6, 7) Lo sem chapter Paul storyim hao Jesus mekem pipol blo Jehovah kamap klin mekem olketa “strong for duim olketa gud samting.” (Tit 2:14) Wanfala gud samting hem for preach and teachim pipol abaotem Kingdom blo God. Sapos iu wanfala young wan, waswe, iu savve iusim strong blo iu for auxiliary or regular pioneer?—Provebs 20:29.

Sapos iu laek pioneer, plan gud mekem iu savve duim datwan. (Lu 14:28-30) Olsem example, tingim waka iu savve duim for kasem selen for helpem iu pioneer. And tingim hao iu savve kasem hour blo iu. Prea lo Jehovah for helpem iu lo diswan. (Sams 37:5) Storyim plan blo iu lo parents and olketa pioneer wea savve gud hao for duim disfala waka. Then duim samting for kasem goal blo iu for pioneer. Jehovah bae blessim iu from iu strong for duim waka blo hem!

LUKIM VIDEO YOUNG PIPOL WEA MEKHAE LONG JEHOVAH, THEN ANSAREM OLKETA KWESTIN HIA:

• Wanem hard taem nao samfala pioneer feisim, and hao nao olketa winim datwan?

• Hao nao parents savve helpem pikinini for kamap regular pioneer?

• Why nao hem important for garem schedule for preaching?

• Hao nao olketa lo kongregeson savve encouragem and helpem wanfala pioneer?

• Olketa wanem blessing nao olketa pioneer kasem?