Lane From Olketa Mature Christian

Lo olketa kongregeson, iumi garem olketa brata and sista wea insaed truth for staka year finis. Iumi laek followim example blo olketa for depend lo Jehovah. Iumi savve askem olketa abaotem wanem organization blo Jehovah bin duim kam, and hao Jehovah helpem olketa for winim olketa problem. Maet iumi savve askem wanfala brata or sista for storyim olketa experience blo hem lo Famili Worship blo iumi.

Sapos iu wanfala mature Christian, storyim olketa experience blo iu and wanem iu lanem from datwan lo olketa narawan lo kongregeson. Jacob and Joseph storyim lo olketa pikinini and relative blo olketa hao Jehovah helpem olketa. (Jenesis 48:21, 22; 50:24, 25) Jehovah sei olketa dadi shud storyim lo olketa pikinini olketa samting wea Jehovah duim bifor. (Diutronomi 4:9, 10; Sams 78:4-7) Hem gud for parents and olketa narawan lo kongregeson storyim lo olketa young wan olketa nambawan samting wea Jehovah iusim organization for duim.

LUKIM VIDEO GOHED WAN MIND TAEM WAKA HEM TAMBU, THEN ANSAREM OLKETA KWESTIN HIA:

• Lo bifor, wanem nao branch lo Austria duim for helpem olketa brata lo samfala kantri wea gavman stopem waka blo iumi?

• Wanem nao olketa brata lo olketa kantri hia duim for strongim faith blo olketa?

• Why nao staka pablisa lo Romania lusim organization blo Jehovah, and hao nao gogo olketa kam bak?

• Hao nao olketa experience hia strongim faith blo iu?