Thrifala Wei wea Iumi Depend lo Jehovah

David winim Goliath bikos hem depend lo Jehovah. (Fas Samuel 17:45) Jehovah laek for strongim olketa servant blo hem. (Mektu Kronikols 16:9) Hao nao iumi savve depend lo help wea Jehovah provaedem winim wei for depend nomoa lo savve and experience blo iumiseleva? Diswan hem thrifala wei wea iumi savve duim:

• Prea evritaem. No just prea for forgiveness bihaen iumi mekem wanfala mistek, bat prea tu for strong taem iumi feisim wanfala temptation. (Mt 6:12, 13) No just prea for Jehovah blessim disison wea iumi mekem finis, bat prea tu for direction and wisdom blo hem bifor iumi mekem olketa disison.​—Jas 1:5

• Garem wanfala Bible reading and study schedule. Readim Bible evriday. (Sams 1:2) Ting raonem olketa Bible example and followim olketa samting wea iu lanem. (Jas 1:23-25) Prepare for ministry winim wei for depend nomoa lo experience wea iu garem finis. Bae iu kasem gud samting from olketa meeting taem iu prepare gud.

• Waka witim organization blo Jehovah. Gohed up-to-date witim direction from organization and kwiktaem for followim. (Nambas 9:17) Lisin lo olketa kaonsel and instruction wea olketa elder givim.​—Heb 13:17

WATCHIM VIDEO NO ENI REASON FOR FRAETEM PERSECUTION, AND THEN ANSAREM OLKETA KWESTIN HIA:

• Wat nao olketa brata and sista fraetem?

• Wat nao helpem olketa for winim wei for fraet?