LAEF BLO CHRISTIAN
No Fraet for Feisim Taem wea World Bae Finis
Klosap nao, patient fasin wea Jehovah garem for pipol lo disfala world bae finis. False religion bae distroe, olketa nation bae join tugeta for attakim pipol blo God, and Jehovah bae finisim wicked pipol lo Armageddon. Iumi olketa Christian barava luk forward for olketa samting hia wea bae happen.
Bat, iumi no savve lo evri samting abaotem datfala big trabol. For example, iumi no savve lo barava taem wea bae hem start. Iumi no savve lo olketa reason wea olketa gavman bae garem for attakim religion. Iumi no savve hao long nao olketa nation bae gohed for attakim pipol blo God and wat nao bae happen lo datfala taem. And tu, iumi no barava savve lo wat nao Jehovah bae iusim for finisim wicked pipol lo Armageddon.
Nomata olsem, Bible storyim information wea iumi needim for mekem iumi no fraet and for gohed strong taem iumi feisim wat bae kamap lo future. For example, iumi savve iumi stap lo olketa last part blo “olketa last day.” (2Ti 3:1) Iumi savve Jehovah bae no letem datfala attak lo religion for gohed for longtaem mekem gavman no distroem tru religion. (Mt 24:22) Iumi savve Jehovah bae sevem pipol blo hem. (2Pe 2:9) And tu, iumi savve Man wea Jehovah chusim hem raeteous and garem paoa for finisim wicked pipol and sevem datfala big crowd lo Armageddon.—Re 19:11, 15, 16.
Olketa samting wea bae happen lo future bae mekem pipol “fraet fogud.” Nomata olsem, taem iumi readim and ting raonem wanem Jehovah duim bifor for sevem pipol blo hem and wat hem sei bae hem duim lo future, hem mekem iumi “standap stret and apim hed,” blo iumi from iumi barava sure taem wea God bae sevem iumi hem klosap nao.—Lu 21:26, 28.