Tingting blo Pipol Abaotem Prea
“Taem mi prea mi feelim God hem lo saed blo mi and holem hand blo mi and leadim mi taem mi lus hope.”—MARÍA.
“Waef blo mi dae bihaen hem sik lo cancer for 13 years. Mi prea lo God evriday, and storyim hard taem mi kasem and hem lisin lo mi. Datwan mekem mi garem peace.”—RAÚL.
“Prea hem nambawan present from God.”—ARNE.
Lo tingting blo María, Raúl, Arne, and staka narawan, prea hem spesol present. Olketa sei prea savve helpem olketa for story lo God, talem thankiu, and askem hem for helpem olketa. Olketa barava trustim disfala toktok lo Bible: “Samting wea iumi barava sure long hem, hem olsem: Eni samting wea iumi askem wea followim tingting bilong God, God hem herem iumi.”—1 John 5:14.
Bat staka pipol faendem hard for bilivim wat Bible talem abaotem prea. Steve sei: “Taem mi 17 year, thrifala fren blo mi dae lo tufala accident. Wanfala dae lo car accident, and nara tufala draon lo sea.” Wat nao Steve duim? Hem sei: “Mi prea lo God for savve why nao olketa samting hia happen, bat mi no kasem eni ansa. So mi ting, ‘For wat nomoa mi prea?’” From staka tingse olketa no kasem ansa for prea blo olketa, olketa tu garem sem tingting olsem Steve.
Olketa nara reason tu stap wea mekem pipol hol bak for prea. Samfala sei from God savve lo evri samting, hem savve finis lo wat iumi needim and olketa problem blo iumi. So iumi no need for prea lo hem.
Olketa narawan tingse God no laek lisin lo prea blo olketa bikos lo olketa nogud samting wea olketa duim bifor. Jenny sei: “Problem blo mi nao, mi feel iusles tumas. Mi duim olketa samting wea mekem miseleva regret, so mi savve hard for God herem prea blo mi.”
Hao nao tingting blo iu abaotem prea? Sapos iu garem sem tingting or daot abaotem wei for prea, bae iu hapi for savve Bible savve givim ansa for eni kwestin iu garem. Iumi savve trustim wat Bible talem abaotem prea.a Hem savve helpem iu for kasem ansa for olketa kwestin olsem:
God lisin lo olketa prea blo iumi tu?
Why nao hem no ansarem samfala prea?
Wat nao iu savve duim for God lisin lo prea blo iu?
Hao nao prea savve helpem iu?
a Bible garem olketa prea blo Jesus and staka faithful man blo God bifor. Olketa Hebrew Scripture, wea pipol kolem Old Testament, garem winim 150 prea.