Why Nao God No Ansarem Evri Prea?
Jehovah God willing and hapi for herem prea wea iumi talem from heart. Bat samfala samting wea iumi duim savve mekem God for no ansarem prea blo iumi. Wat nao olketa samting hia, and wat nao iumi shud tingim taem iumi prea? Bae iumi storyim samfala Bible principle.
“Taem iu prea, no talem sem samting evritaem.”—Matthew 6:7.
Jehovah no laekem iumi for repeatim olketa prea wea iumi memorizim or readim from wanfala prea buk. Bat hem laekem iumi for story from heart. Tingim, bae iu feel nogud sapos fren blo iu story lo iu and repeatim sem toktok evriday. Olketa gud fren storyim tingting and feeling blo olketa lo each other. So taem iumi prea lo God and iusim toktok blo iumiseleva, datwan showim iumi fren gud witim hem.
“Taem iufala askem samting, iufala no kasem datwan bikos reason why iufala askem hem no stret.”—James 4:3.
Iumi savve God bae no ansarem prea blo iumi sapos iumi askem samting wea iumi savve hem no laekem iumi for duim or for garem. Olsem example, sapos eniwan gambol and prea lo God for helpem hem for lucky and winim selen, bae Jehovah ansarem prea blo hem? Hem talem iumi klia for no greedy and no biliv lo gud luck. (Aesaea 65:11; Luke 12:15) Hem no mek sense for Jehovah ansarem prea olsem! For God ansarem prea blo iumi, iumi mas mek sure wat iumi askem hem followim toktok blo hem lo Bible.
“Sapos yu les fo herem lo, [Jehovah] bae les fo herem prea blong yu.”—Provebs 28:9.
Lo taem blo Bible, God no ansarem prea blo olketa wea no followim law blo hem. (Aesaea 1:15, 16) Tingting blo hem no change. (Malakae 3:6) Sapos iumi laekem God for lisin lo prea blo iumi, iumi mas duim best for obeyim law blo hem. Bat hao sapos iumi duim wanfala rong samting bifor? Hao, Jehovah bae no lisin lo iumi nao? Nomoa! God bae forgivim iumi sapos iumi changem laef blo iumi and duim best for mekem hem hapi.—Acts 3:19.