Waswe, Iu Tingim Yet?
Waswe, iu tingim yet samfala gud point from olketa Wastaoa blo disfala year? Trae ansarem olketa kwestin hia:
Wat nao hem minim for gohed “changem tingting” blo iu? (Rome 12:2)
Hem no minim for iumi duim olketa gud samting nomoa. Bat hem minim for iumi lukluk gud lo iumiseleva and changem eni samting wea iumi need for changem for fitim olketa standard blo God.—w23.01, page 8-9.
Hao nao iumi savve balance taem iumi lukim olketa samting wea happen lo world?
Iumi interest lo olketa samting wea happen lo world distaem wea gohed fulfillim Bible profesi. Bat hem gud for iumi no trae for guessim bikos datwan savve divaedem kongregeson. Iumi shud basem story blo iumi lo information wea organization blo Jehovah pablisim. (1 Cor. 1:10)—w23.02, page 16.
Hao nao baptism blo Jesus difren from olketa follower blo hem?
Jesus no need for dedicatem hemseleva lo God olsem iumi, bikos hem born kam lo wanfala nation wea dedicate lo God finis. Jesus hem wanfala perfect man wea no garem sin. Hem no need for repent bikos hem no garem sin.—w23.03, page 5.
Hao nao iumi savve helpem olketa narawan for koment lo meeting?
Iumi savve givim short koment mekem olketa narawan tu garem chance for koment. Iumi savve avoidim tu for storyim staka point tumas. Datwan savve helpem olketa narawan for koment lo samfala nara point.—w23.04, page 23.
Olsem Isaiah 35:8 storyim, wat nao datfala “road wea holy” hem minim?
Hem tokpiksa highway road wea olketa Jew followim taem olketa lusim Babylon for go bak lo hom blo olketa. Waswe lo distaem? For staka handred year bifor 1919, Jehovah iusim samfala man for redyim road hia lo wei for transleitim and printim olketa Bible and samfala samting moa. Pipol blo God stap lo spiritual paradaes and bin travel lo “Road wea Holy” wea lead go for kasem olketa blessing anda lo Kingdom lo future.—w23.05, page 15-19.
Wat nao tufala tokpiksa woman wea Bible buk Proverbs chapter 9 storyim?
Bible buk Proverbs storyim invitation blo wanfala “stupid woman” wea hem lead go lo “Grev.” And hem storyim “tru wisdom,” wea hem representim wise woman wea invitation blo hem lead go for laef olowe taem iumi followim road blo understanding. (Prov. 9:1, 6, 13, 18)—w23.06, page 22-24.
Hao nao wei wea God hambol and tingim narawan hem showaot taem hem deal witim Lot?
Jehovah talem Lot for lusim Sodom and for ranawe lo maunten. Bat taem Lot begim Jehovah for ranawe go lo Zoar, Jehovah letem hem for ranawe go lo there.—w23.07, page 21.
Wat nao wanfala waef savve duim if hasband blo hem interest for lukim pornography?
Waef mas no blamem hemseleva. Hem shud focus lo frenship blo hem witim Jehovah and readim and ting raonem olketa story lo Bible abaotem olketa woman wea kasem hard taem bat olketa kasem comfort from God. Waef savve helpem hasband for avoidim samfala situation wea savve temptim hem.—w23.08, page 14-17.
Taem samwan kwestinim biliv blo iumi, hao nao wei for luksavve helpem iumi for hambol?
Hem gud for iumi ting lo kwestin wea samwan askem olsem hem important and hem helpem iumi for savve lo tingting blo hem. And goal blo iumi hem for evritaem kaen.—w23.09, page. 17.
Wat nao iumi savve lanem from Mary wea strong for duim will blo God?
Taem Mary savve dat bae hem kamap mami blo Messiah, Mary lukaotem help from olketa narawan. Angel Gabriel and Elizabeth storyim samting wea encouragem Mary. Olsem Mary, olketa brata and sista tu savve strongim iumi.—w23.10, page 15.
Hao nao maet Jehovah ansarem prea blo iumi?
Jehovah promis for lisin lo olketa prea blo iumi and hem tingim plan blo hem taem hem lisin olketa prea blo iumi. (Jer. 29:12) Hem maet ansarem olketa sem prea lo difren wei, bat hem bae evritaem helpem iumi.—w23.11, page 21-22.
Lo Rome 5:2 hem storyim “hope,” so why nao Paul storyim hope moa lo verse 4?
Taem samwan herem gud nius, maet hem garem hope for enjoyim laef lo paradaes earth. Bat taem hem feisim olketa hard taem and no givap, and savve God hapi lo hem, hope wea hem garem bae hem kamap strong and real lo hem.—w23.12, page. 12-13.