Leta From Governing Body—2016

Dear Olketa Brata and Sista:

Long Isaiah 26:12, profet Isaiah hem sei: “Jehovah, . . . iu nao blessim evri samting wea mifala duim.” Disfala toktok showimaot Isaiah hem luksavve evri gud samting wea olketa long Judah kasem, hem bikos Jehovah blessim olketa. Taem iumi tingim evri gud samting wea happen long last service year, iumi luksavve Jehovah blessim wanem iumi duim tu. Jehovah hem duim “olketa nambawan samting wea no happen” bifor! (Ex. 34:10) Hem gud for iumi tingim olketa gud samting hia.

Distaem website bilong iumi, jw.org, hem stap long winim 600 languis, bat pipol savve readim or daonlodim olketa pablikeson long winim 750 languis from jw.org. Waswe, datfala website helpem pipol wea laek for savve long God? Ia. Tingim disfala example: Wanfala hasband and waef lukim wei wea staka pipol long religion no duim samting followim wanem Bible talem. So tufala duim research abaotem olketa religion and faendem website bilong iumi. Tufala start for readim olketa article and lukluk long olketa video long website. And tu, olketa daonlodim datfala buk, Examining the Scriptures Daily and readim text evriday witim tufala teenage pikinini bilong tufala. Wanday, taem tufala duim datwan, Olketa Jehovah’s Witness noknok long door bilong olketa. Olketa Witness faendemaot famili hia changem staka samting long laef bilong olketa bikos long wanem olketa lanem from website. Olketa aotem olketa tattoo and stop for werem earing long olketa difren part long body. Olketa aotem olketa idol bilong olketa, no celebratem Christmas and Easter, and stop for lukluk long olketa rabis movie. Olketa duim evri samting hia bifor olketa meetim olketa Witness! Distaem, datfala hasband and waef kamap anbaptaes pablisa and plan for baptaes, and wanfala pikinini bilong tufala hem anbaptaes pablisa tu.

Mifala hapi for herem iufala tinghae long JW Broadcasting tu. Distaem datfala program hem stap long winim 70 languis, and olketa plan for transleitim datwan long samfala nara languis tu. Evri month staka famili lukluk long Broadcasting long taem bilong Famili Worship. Wanfala brata sei: “Distaem organization bilong Jehovah hem barava big, bat from mifala evritaem lukluk long JW Broadcasting, mifala feel olsem mifala savve gud long olketa wea waka long Branch long America!”

Evriwan enjoyim olketa convention wea kamap long 2015 service year. Datfala convention garem 42 video and piksa, and long start bilong evri session, olketa pleim barava naes music. Wanfala brata sei: “Luk olsem no eniwan laek for go aot from convention long taem bilong program, nogud olketa misstim eni gud samting.” Wanfala field missionary hem sei: “Taem mi lukluk long olketa video long convention, datwan mekem mi barava tinghae long Kingdom bilong God.”

Long last service year, nara blessing from Jehovah hem olketa niu Kingdom song wea iumi kasem. Wanfala hasband and waef sei: “Taem mitufala herem olketa niu song, hem olsem Jehovah hem hagem mifala. Taem mifala kasem samfala hard samting, olketa song hia mekem mitufala tingim olketa gud samting.” Long convention, iumi lukim video wea showim bigfala waka wea olketa long Watchtower orchestra and choir duim for mekhae long Jehovah witim olketa song hia.

Waswe, samfala long kongregeson bilong iu iusim olketa trolley for duim preaching waka? Iumi luksavve diswan hem narafala blessing. Distaem samfala wea stap long olketa building wea iumi hard for go insaed bikos security stopem iumi, olketa garem chance for savve long gud nius from olketa tekem olketa buk long trolley. Staka narawan tu, olsem samfala Witness wea inactive, kasem spiritual help from olketa wea duim disfala waka. Long Korea, long January 2015, wanfala man hem go story long olketa wea standap witim trolley. Hem talem olketa hem start for ting abaotem olketa spiritual samting. Olketa arrange for hem studyim Bible and long February, hem go long first meeting bilong hem, then long March hem stop for smoke. Long April hem go tour long branch wea stap long South Korea, and distaem hem gohed for changem staka samting long laef bilong hem. Staka experience olsem gohed for happen raonem world.

Mifala tingim tu long convention olketa wea inactive kasem datfala brochure, Kam Bak Long Jehovah. Mifala hope datwan encouragem olketa for worshipim Jehovah moa bifor end hem kam. Mifala encouragem iufala for barava welkamim olketa wea laek for kam bak long Jehovah.—Ezek. 34:16.

Iumi luksavve Jehovah barava blessim pipol bilong hem long last service year. Wanem moa bae hem duim for iumi long future? Bae iumi lukluk. Bat distaem, mifala long Governing Body laek for talem iufala mifala lovem iufala evriwan and mifala gohed for prea for iufala.

Olketa brata bilong iufala,

Governing Body Bilong Olketa Jehovah’s Witness