Wanfala Flood Tekem Kam Gud Nius
Lo 2017, twelvfala Witness go lo boat blo olketa wea garem nem Sturi Yamni and lusim Mosquito (Miskito) Coast blo Nicaragua. Stephen, wanfala crew member sei: “Goal blo mifala hem for kasem wanfala smol grup blo olketa Witness wea stap lo farawe ples, mekem mifala savve encouragem olketa and helpem olketa for preachim gud nius lo big territory blo olketa.”
Twelvfala Witness hia lusim Pearl Lagoon and go followim Río Grande de Matagalpa river for 200 kilometer. Olketa no savve nem blo boat blo olketa, wea minim “Gud Nius” lo Miskito languis, bae garem spesol mining for pipol wea stap saed lo river. Bihaen olketa travel for 12-fala hour, wea datwan no kaontem taem wea olketa stop for sleep lo naet lo wanfala ples, olketa Witness hia kasem La Cruzde Río Grande. Sixfala Witness wea stap lo there welkamim olketa spiritual brata and sista blo olketa.
Lo datfala naet, wanfala nogud samting happen. Wanfala big wind blow and big rain foldaon klosap lo hed blo Río Grande de Matagalpa river. Insaed tu-thri hour nomoa, river hem flood and ran big tumas for tufala day. Kingdom Hall and staka haos lo La Cruz hem flood. Olketa brata and sista wea visit kam helpem pipol lo there for lusim haos blo olketa. Staka lo olketa spendem next tufala naet lo tu-story haos blo wanfala Witness.
Kingdom Hall lo La Cruz wea flood
Lo mek-thri naet, mayor blo La Cruz go lukim olketa Witness wea visit kam for askem help blo olketa. From boat blo olketa Sturi Yamni hem nomoa boat wea strong for go lo river wea flood, mayor askem crew for transportim olketa man wea duim relief waka for go kasem olketa community wea needim help. Olketa Witness hapi for duim datwan.
Lo next morning, thrifala Witness witim relief team lusim datfala ples. Stephen sei: “Taem mifala go, river hem ran big narawe. Olketa big tree wea foldaon float go daon lo river, olketa bigfala whirlpool kamap lo river, and wata hem ran fast tumas.” Nomata hem raf tumas, boat hem kasem thrifala community.
Thrifala Witness hia iusim chance blo olketa for comfortim pipol wea stap lo olketa vilij hia. Olketa Witness givimaot tu datfala 2017 Awake! magasin wea garem title “When Disaster Strikes—Steps That Can Save Lives.” Disfala magasin hem barava helpem olketa.
Pipol wea stap lo olketa community saed lo river barava tinghae lo help wea olketa Witness givim and encouragement wea olketa givim from Bible. Samfala lo vilij sei: “Olketa willing for help taem mifala kasem hard taem.” Olketa narawan sei: “Olketa barava lovem neiba blo olketa.” Bihaen pipol hia lukim wanem olketa Witness hia duim for helpem olketa nara Witness and olketa narawan lo vilij, plande pipol willing for lisin lo message lo Bible wea comfortim olketa.