Waswe, Olketa Jehovah Witness Preach Bikos Olketa Laek for Sev?

Nomoa. Mifala preach bat mifala no duim datwan from mifala tingse datwan bae mekem mifala sev. (Ephesus 2:8) Why nao olsem?

Tingim disfala example: Wanfala rich man mekem promis for givim expensive present long evriwan wea kam long wanfala ples long day wea hem markem. Sapos iu bilivim datfala man, waswe, bae iu duim wanem hem talem? Barava nao! Maet iu laek talem tu olketa fren and famili bilong iu abaotem datfala promis, mekem olketa tu savve kasem samting wea hem talem. Bat nomata sapos iumi go and duim wanem datfala man talem, hem datfala man nao wea hem disaed for givim datfala present bilong hem.

Long sem wei tu, Olketa Jehovah Witness bilivim olketa promis bilong God hao olketa wea obeyim hem bae kasem laef olowe. (Rome 6:23) Mifala storyim olketa biliv bilong mifala long olketa narawan bikos mifala hope olketa bae kasem gud samting from olketa promis bilong God. Hem no wei wea man hem go preaching wea bae mekem hem sev. (Rome 1:17; 3:28) No eni samting wea man savve duim bae forcem God for mas blessim hem. “Hem sevem iumi bikos hem showimaot mercy long iumi, no bikos long olketa raeteous samting wea iumi duim.”—Titus 3:5