Waswe, Olketa Jehovah’s Witness Tambuim Samfala Movie, Buk, or Song?
Nomoa. Organization blo mifala no chekim olketa movie, buk, or song for mekem rul abaotem wanem pipol shud stap klia lo hem. Why nao olsem?
Bible encouragem man wanwan for “iusim evritaem tingting blo [hem]” mekem hem fit for luksavve lo wanem hem stret and wanem hem no stret.—Hebrew 5:14.
Bible storyim olketa samting wea Christian savve ting raonem taem hem disaedem sapos samting bae fitim or nomoa.a Lo evri samting mifala duim, goal blo mifala hem for “gohed for mek sure [mifala] savve long samting wea Lord hapi long hem.”—Ephesus 5:10.
Bible hem sei famili hed garem raet for disaedem staka samting insaed famili, so maet hem disaedem samfala movie, buk, or song hem no fitim for famili. (1 Corinth 11:3; Ephesus 6:1-4) Bat no eniwan garem raet for mekem olketa rul for tambuim samfala movie, song, or buk for olketa wea no insaed famili blo hem.—Galatia 6:5
a Olsem example, Bible hem sei eni samting wea mekhae lo wei for duim devildevil samting, wei for durong, or wei for raf hem barava nogud.—Deuteronomy 18:10-13; Ephesus 5:3; Colossae 3:8.