Why Nao Olketa Jehovah’s Witness No Ansarem Evri Toktok wea Pipol Talem Againstim Olketa?
Taem eniwan tok againstim or tok spoelem mifala Olketa Jehovah’s Witness, mifala followim advaes wea stap long Bible. Olsem example, Bible sei: “Man bae mek shame long hemseleva sapos hem trae for stretem eniwan wea tok spoelem hem.” (Proverbs 9:7, 8; 26:4) Winim wei for warim and raoa abaotem olketa laea story wea pipol talem, mifala evritaem laek for mekem God hapi.—Psalm 119:69.
Nara samting tu, Bible sei “taem for stap kwaet and taem for toktok” tu hem stap. (Ecclesiastes 3:7) Mifala hapi for ansarem kwestin bilong pipol wea laek for savve long tru story, bat mifala no laek for argue witim eniwan. Mifala duim diswan from mifala followim olketa teaching and example bilong Jesus and olketa Christian long first century.
Jesus stap kwaet nomoa taem olketa accusim hem front long Pilate. (Matthew 27:11-14; 1 Peter 2:21-23) And tu, Jesus hem no laek for ansarem olketa wea sei hem man for drunk and man for kaikai tumas. Bat, Jesus followim disfala principle wea sei: “Olketa gudfala samting wea man duim nao showimaot hem garem gudfala tingting.” (Matthew 11:19) Nomata olsem, long taem wea fitim, hem no hol bak for ansarem olketa wea tok spoelem hem.—Matthew 15:1-3; Mark 3:22-30.
Jesus talem olketa disaepol for no wikdaon taem pipol talem olketa laea samting abaotem olketa. Hem sei: “From iufala olketa disaepol bilong mi, pipol bae tok daonem and spoelem iufala and talem enikaen nogud samting abaotem iufala wea no tru. Nomata olsem, iufala bae hapi nomoa.” (Matthew 5:11, 12) Bat, Jesus sei taem pipol tok spoelem olketa disaepol datwan savve givim chance for olketa witness abaotem hem. And hem talem disfala promis: “Mi bae givim iufala wisdom and helpem iufala for savve wanem for talem, and olketa enemy bilong iufala bae no fit for talem eni samting nao.”—Luke 21:12-15.
Aposol Paul talem olketa Christian for no join insaed raoa bilong pipol wea againstim olketa, and hem sei kaen raoa olsem “hem iusles and no savve helpem man.”—Titus 3:9; Rome 16:17, 18.
Aposol Peter encouragem olketa Christian for ansarem eniwan wea askem kwestin abaotem biliv bilong olketa, long taem wea fitim. (1 Peter 3:15) Nomata olsem, hem luksavve staka taem wanem man duim nao savve ansarem kwestin bilong pipol winim samting hem talem. Hem sei: “Duim gudfala samting for stopem krangge toktok bilong pipol wea no garem gudfala tingting.”—1 Peter 2:12-15.