Sonar Bilong Dolphin

Olketa dolphin savve mekem olketa difren saond, olsem click and whistle, and then olketa lisin kam long echo bilong saond hia for helpem olketa savve wea for go and wanem hem stap raonem olketa. Olketa scientist gohed studyim natural sonar (olketa saond) bilong bottlenose dolphin (Tursiops truncatus) for helpem olketa wakem olketa acoustic system (olketa machine) wea olketa savve iusim andanit long wata. Olketa machine hia savve helpem olketa for stretem olketa problem wea happen andanit long wata wea nara technology no savve duim distaem.

Samting for tingim: Sonar bilong dolphin mekem hem savve faendem olketa fish wea haed andanit long sand long botom bilong sea and for luksavve wanem nao wanfala fish and wanem nao wanfala ston. Keith Brown, wanfala savveman long Heriot-Watt University, long Edinburgh long Scotland storyim hao dolphin savve luksavve tu “long olketa container wea garem fresh wata, solt wata, syrup, or oil insaed wea stap ten meter [from olketa].” Olketa scientist laek for wakem olketa machine wea fit for duim sem samting wea olketa dolphin savve duim.

Olketa man wea duim research trae for copyim wei wea olketa dolphin mek noise and hao olketa lisin kam long echo. From datwan, olketa wakem wanfala sonar machine wea sheip bilong hem olsem pipe and hem garem olketa spesol electronic insaed. Pipe hia hem no winim wan meter long. Olketa putim machine hia long wanfala robot vehicle wea olketa iusim andanit long wata wea luk olsem torpedo, and olketa iusim datwan for luksavve wanem hem stap long botom bilong sea, for faendem olketa cable or pipeline wea stap andanit long sand long botom bilong sea, and for chekim datwan long wei wea olketa no need for tasim. Olketa wea wakem kaen machine hia luksavve disfala machine bae helpem olketa company wea mining for oil and gas long sea. Disfala sonar machine wea olketa copyim followim sonar bilong dolphin shud mekem olketa kasem moa information winim olketa sonar machine wea stap finis. Hem bae helpem olketa wakaman for savve long best ples for putim olketa equipment andanit long wata, for luksavve sapos eni samting spoelem equipment hia, olsem sapos eni smol brek long olketa post wea sapotim oil-rig mine or eni samting blokem pipeline.

Wanem nao tingting bilong iu? Waswe, iu tingse sonar bilong bottlenose dolphin hem kamap seleva nomoa? Or waswe, samwan nao designim?