Olketa Law blo God Abaotem Wei for Klin Hem Barava Fitim
Just bifor olketa Israelite go insaed lo Promis Land, samting olsem 3,500 year go finis, God sei hem bae protectim olketa from olketa “ravis sik” blo Egypt wea olketa lukim finis. (Diutronomi 7:15) Wanfala wei hem duim diswan, hem givim olketa instruction abaotem wei for stap klin and wanem for duim for stopem olketa sik for kasem olketa. Tingim olketa example hia:
Olketa law wea God givim sei olketa Israelite mas swim and wasim kaleko blo olketa.—Levitikas 15:4-27.
Saed lo toilet, God sei: “Oltaem, yufala mas makem wanfala ples aotsaet long ples blong ami, mekem olketa man i save go long bus long hem. An oltaem, yufala mas karim stik fo yusim taem yufala go long bus. Yufala mas yusim stik ya fo digim hol an fo berem siti ya.”—Diutronomi 23:12, 13.
Pipol wea kasem sik wea savve pas go lo narawan mas stap separate from olketa narawan go kasem taem olketa gud bak. Bifor olketa savve kam bak, olketa mas wasim kaleko blo olketa and swim mekem olketa savve “klin” lo eye blo God.—Levitikas 14:8, 9.
Eniwan wea tasim dead body mas stap separate for samfala day.—Levitikas 5:2, 3; Nambas 19:16.
Staka handred year bihaen nao olketa scientist just luksavve olketa law wea God givim lo olketa Israelite saed lo medical and wei for stap klin hem barava fitim.
Olketa nara nation lo datfala taem no garem hae standard saed lo wei for klin. Tingim samfala example hia:
Staka pipol lo datfala taem kasem olketa sik and staka baby dae tu bikos wata blo olketa no klin, olketa no keepim gud kaikai blo olketa or preparem gud, and olketa savve torowem rabis olobaot lo street.
Olketa doctor lo datfala taem no savve abaotem olketa germ and pathogen (kaen bacteria) wea savve kosim sik. Olketa lo Egypt iusim blood blo olketa lizard, toilet blo olketa pelican, olketa rat wea dae finis, mimi, or bred wea garem mold lo hem for “treatim” olketa sik. Plande taem olketa iusim tu toilet blo olketa man and animal for treatim pipol.
Olketa lo Egypt bifor kamap sik bikos lo olketa difren parasite wea stap lo Nile River and olketa stream wea kamaot from datfala river. And tu, plande baby lo Egypt dae bikos lo diarrhea and olketa narakaen sik wea olketa kasem from rotten kaikai.
Bat olketa Israelite garem gudfala health and kasem gud samting bikos olketa followim Law blo God saed lo wei for klin.