Olketa Stop for Helpem Hem

Lo wanfala day lo Alberta, Canada, Bob draevem bas blo hem samting olsem 100 kilometer per hour then seknomoa tire lo bas hem bosta. Lo datfala day hem cold tumas and wanfala big wind hem blow, bat Bob no luksavve wanem hem happen so hem gohed draev for kasem haos blo hem wea stap faevfala kilometer from ples wea tire hem bosta.

Bob raetem leta lo Kingdom Hall blo Olketa Jehovah’s Witness klosap lo ples blo hem and hem storyim next samting wea happen. Hem sei: “Faevfala young wan insaed lo wanfala car draev klosap lo mi and daonem window for talem mi tire lo bas blo mi hem bosta. So mifala stop, and olketa laek changem tire blo mi. Mi nating savve sapos mi garem spare tire or wanfala jack for apim bas tu. Taem mi sidaon lo wheelchair blo mi lo saed road, olketa young wan hia go andanit lo bas and faendem spare tire and jack, and olketa changem tire. Weather hem barava cold and hem snow tu. Nomata olketa werem gudfala kaleko, olketa changem datfala tire mekem mi savve gohed draevem bas. Sapos mi nomoa stap for changem tire, bae hard nao for mi duim datwan.

“Mi laek talem thankiu lo faevfala young Witness hia wea helpem mi. Olketa draev lo area for preach lo pipol, bat olketa duim tu samting wea olketa preach abaotem. Olketa barava helpem mi and mi tinghae tumas lo wanem olketa duim bikos sapos olketa no stap bae hem tek longfala taem for mi changem datfala tire. Mi no expectim eni young angel olsem for stap lo road lo datfala day, bat hem olsem God sendem olketa young wan hia for helpem mi!”