Hem Lane From Olketa Prisoner

Wanfala man blo Eritrea wea kamap refugee hem go stap lo Norway lo 2011. Taem olketa Jehovah’s Witness meetim hem and story witim hem, hem sei hem meetim olketa Witness lo hom blo hem tu. Hem storyim hao taem hem lo army, hem lukim olketa Witness wea stap lo prison bikos lo faith blo olketa. Olketa bigman trae forcem olketa for joinim army, bat olketa no willing, nomata olketa barava raf lo olketa.

Gogo, samfala nogud samting happen lo laef blo hem and olketa putim hem lo prison tu. Lo there hem meetim thrifala Witness: Paulos Eyasu, Negede Teklemariam, and Isaac Mogos. Start kam lo 1994, thrifala brata hia stap lo prison bikos lo faith blo olketa.

Taem hem stap lo prison hem lukim hao olketa Jehovah’s Witness live followim olketa hae standard wea olketa teachim lo narawan. Hem lukim hao olketa honest and sharem kaikai blo olketa witim olketa nara prisoner tu. Hem lukim tu hao olketa studyim Bible tugeta evriday and invaetem olketa nara prisoner for join insaed. Olketa savve aot from prison sapos olketa saenem nomoa pepa for sei olketa bae finis for worshipim Jehovah, bat olketa no willing for duim datwan.

Hem barava tinghae lo olketa brata hia. Bihaen hem aot from prison and muv go lo Norway, hem laek minim why nao olketa Jehovah’s Witness garem strongfala faith olsem. So taem hem meetim olketa Witness, semtaem nomoa hem start for studyim Bible witim olketa and go lo olketa meeting.

Lo September 2018, hem baptaes and kamap Jehovah’s Witness. Distaem hem mekius lo eni chance wea kamap for story witim pipol blo Eritrea and Sudan wea story lo sem languis olsem hem, and hem encouragem olketa for studyim Bible mekem olketa garem strongfala faith.