Milk From Susu blo Mami

Wanfala buk for olketa midwaef hem sei; “Formula milk hem no barava semsem olsem milk from susu blo mami.” Wanfala reason why milk from susu blo mami hem important for baby, hem bikos body blo mami change for matchim wat baby needim.

Tingim: Milk from susu blo mami hem change lo start go kasem end blo each feeding session. Taem baby start susu, milk hia garem moa protein, olketa vitamin, minerals, and wata, bat gogo for end blo feeding session, milk hia hem garem moa fat, wea mekem baby hem fulap. And tu, milk from susu blo mami hem savve change for followim age blo baby and olketa season lo year.

Insaed milk from susu blo mami, amount lo samfala hormone, olsem melatonin, hem barava hae during lo naet, bat olketa nara hormone hem savve hae during lo day. Depend lo wat taem lo day, olketa hormone hia savve mekem baby for laek sleep or wekap, wea diswan helpem baby for garem regular pattern for sleep and for wekap.

Lo first tu thri days afta mami hem bonem baby, susu blo mami producem milk wea luk yellow wea olketa kolem lo colostrum. Hem isi for stomach blo baby digestim colostrum and hem garem rich nutrients wea savve barava helpem baby. Colostrum hia garem staka antibodies wea protectim baby from sik. And tu, colostrum hem olsem medicine wea savve help for klinim stomach blo baby wea just born.

Olketa mami wea bonem twin no need for wari if olketa bae producem inaf milk or nomoa, bikos body blo mami bae change for matchim wat tufala baby blo hem needim.

Wat nao tingting blo iu? Hao, milk from susu blo mami wea garem olketa spesol samting hia, hem kamap seleva nomoa? Or samwan nao designim?