Waka blo Olketa Hormone Insaed Body

For mekem body blo iumi gohed waka gud, blood blo iumi needim raet amount blo olketa mineral, olsem calcium. Bat amount blo olketa mineral wea iu consumim each day hem no semsem. Wat nao body blo iu duim for garem raet amount blo olketa mineral for circulate lo body?

Wanfala man wea healthy, body blo hem bae kontrolem raet amount blo olketa mineral taem hem producem, stoarem, and releasem olketa hormone insaed lo blood. Hormone hem olketa chemical wea help for kontrolem olketa difren function lo body. Even wanfala smol amount blo hormone nomoa, hem savve barava affectim body blo iu. Encyclopedia Britannica sei, taem olketa hormone lo body release, “hem no samting wea happen on and off nomoa, bat hem wanfala spesol process wea releasem raet amount lo raet taem.”

For example, olketa parathyroid gland wea stap lo throat savve detectim eni smol change lo amount blo calcium insaed lo blood. Size blo each wan lo fofala gland hia, hem olsem wanfala grain blo rice.

Taem olketa gland hia detectim dat level blo calcium hem low, bae olketa kwiktaem releasem wanfala hormone insaed tu-thri second nomoa, wea datwan givim signal go lo bone wea stoarem calcuim for releasem calcium hia insaed lo blood. Hormone hia sendem signal tu go lo tufala kidney for stop filterim calcium from blood, and smol intestine blo iu hem increasim amount blo calcium wea hem absorbim from kaikai.

Bat, if blood garem tumas calcium, datfala thyroid—wea hem wanfala separate gland—bae releasem wanfala difren hormone. Disfala hormone givim signal lo olketa bone for absorbim and stoarem moa calcuim, and givim signal lo tufala kidney tu for filterim and aotem datfala extra amount blo calcuim.

Olketa hormone hia hem tufala nomoa lo winim wan handred hormone wea body blo iumi iusim for adjustim and mekem olketa difren process lo body for gohed waka.

Wat nao tingting blo iu? Hao, waka blo olketa hormone insaed body hem kamap seleva nomoa? Or, samwan nao designim?