Olketa Kongregeson Iusim Videoconference for Meeting

Staka gavman lo world talem pipol for mas social distancing and olketa stopem pipol for hipap lo olketa pablik gathering. Olketa Jehovah’s Witness disaed for obeyim wanem gavman talem bat olketa mas gohed lo worship blo olketa tu. For duim datwan, olketa kongregeson iusim olketa videoconferencing app, olsem Zoom, for duim olketa meeting.

For iumi gohed lo olketa kongregeson meeting blo iumi evritaem, Governing Body appruvim for iusim selen from donation for peim olketa Zoom account for olketa kongregeson. Diswan helpem tumas samfala kongregeson wea no fit for peim videoconference account wea kost blo hem $15-$20 US dollar or winim datwan. Olketa kongregeson hia savve iusim olketa free app wea no staka pipol savve connect lo hem and no sef. Olketa kongregeson wea iusim olketa Zoom account hia wea organization peim, kasem gud samting from hem garem security setting wea isi for iusim and staka pipol savve connect kam lo each meeting. Kam kasem distaem, winim 65,000 kongregeson lo winim 170 kantri nao iusim olketa Zoom account hia.

Kairagi Kongregeson, wea stap lo Manado, North Sulawesi, Indonesia, stop for iusim wanfala free videoconferencing app and start for iusim Zoom account blo organization. Brata Hadi Santoso sei: “Distaem nomata olketa brata and sista wea no savve hao for iusim olketa electronic device savve enjoyim olketa meeting, bikos olketa no need for login staka taem lo taem blo olketa meeting.”

Lester Jijón, Jr., wanfala elder lo Guayacanes Oeste Kongregeson lo Guayaquil, Ecuador, sei: “From staka brata and sista kasem hard taem saed lo selen, datwan mekem hem no isi for samfala kongregeson peim wanfala Zoom license for full kongregeson attendim olketa meeting. Distaem, mifala hapi tumas for garem disfala Zoom account wea organization provaedem, wea hem no garem limit lo pipol wea savve connect lo hem, so mifala no hol bak for invaetem olketa narawan.”

Johnson Mwanza, elder lo Ngwerere North Kongregeson lo Lusaka, Zambia, sei: “Evritaem nomoa olketa brata and sista gohed sei, ‘Zoom account wea organization provaedem mekem mifala klos lo olketa brata and sista, and tu hem mekem mifala luksavve Jehovah lovem and tingim mifala.’”

Organization iusim selen wea olketa putim for disaster relief for peim olketa Zoom account hia. Datfala selen kam from donation wea iufala givim for sapotim waka raonem world. Staka lo olketa donation hia mifala kasem online from donate.jw.org. Mifala thank you lo olketa donation wea iufala givim wea help tu lo olketa nara relief waka evriwea raonem world.—2 Corinth 8:14.