Olketa wea Garem Plande Samting Helpem Olketa wea Needim Samting

Lo winim 200 kantri lo world, Olketa Jehovah’s Witness teachim pipol abaotem Bible and duim olketa nara important waka for helpem pipol. Bat samting olsem 35 kantri hia nomoa kasem inaf donation for peim olketa expense for kantri blo olketa. So hao nao olketa nara kantri savve peim olketa expense blo olketa sapos olketa no kasem inaf donation?

Governing Body blo Olketa Jehovah’s Witness ting raonem spiritual need blo olketa Witness and wanem olketa needim for gohed preachim gud nius. Then olketa mekem budget and iusim olketa donation lo stretfala wei. Sapos wanfala branch office kasem moa donation winim expense blo olketa, branch hia givim datfala extra selen lo olketa nara kantri wea no kasem inaf donation. Disfala arrangement hem followim example blo olketa Christian lo first century wea helpem olketa narawan mekem “evriwan garem samting wea [olketa] needim.” (2 Corinth 8:14) Olketa givim selen wea olketa no needim for helpem olketa Christian wea garem need.

Wanem nao tingting blo olketa brata wea kasem olketa donation hia from olketa nara branch? Tingim wanem hem happen lo Tanzania, wea winim haf lo pipol lo there kasem samting olsem 16 Solomon Islands Dollar nomoa each day. Lo ples hia, olketa iusim donation hia for renovatim wanfala Kingdom Hall wea Mafinga Kongregeson iusim. Datfala kongregeson sei: “Bihaen olketa renovatim Kingdom Hall, plande pipol moa attendim olketa meeting! Mifala barava hapi lo organization blo Jehovah and olketa brata and sista raonem world for donation blo olketa. Datwan helpem mifala for enjoyim wanfala nambawan ples for worship.”

Lo Sri Lanka, samfala brata and sista no kasem inaf kaikai bikos lo COVID-19 pandemic. Tufala nao hem Imara Fernando and young son blo hem, Enosh. Bat bikos branch hem kasem olketa donation from olketa nara kantri, tufala kasem wanem olketa needim. Tufala raetem wanfala card wea sei: “Mitufala laek for talem thankiu lo olketa brata wea showimaot love lo mitufala lo hard taem hia. Mitufala barava hapi for insaed disfala famili, and mitufala prea Jehovah bae gohed helpem evri brata lo olketa last day hia.”

Nomata wea nao olketa brata and sista stap, olketa hapi for sharem wanem olketa garem witim olketa narawan. Olsem example, Enosh mekem wanfala smol contribution box for hemseleva, mekem hem tu savve putim donation for helpem olketa famili wea garem need. Guadalupe Álvarez garem sem tingting. Disfala sista stap lo wanfala area lo Mexico wea samfala nomoa kasem smol pei or no kasem pei evri week. Bat hem givim donation wea hem fit for givim. Hem sei: “Mi thankiu lo Jehovah bikos hem gud tumas and lovem mi. Mi savve donation blo mi bae olketa addim go witim donation blo olketa narawan and datwan bae helpem olketa brata blo mi wea garem need.”

Olketa branch office wea sendem selen lo olketa nara kantri wea garem need hapi for duim datwan. Anthony Carvalho, wea waka lo Branch Komiti lo Brazil sei: “For staka year, mifala needim olketa donation from olketa nara kantri for helpem waka lo kantri blo mifala. From mifala kasem help olsem, mifala lukim staka pipol kam insaed lo truth. Distaem mifala kasem inaf donation and mifala garem privilege for helpem olketa narawan. Olketa brata lo Brazil lukluk lo preaching waka wea gohed raonem world and ting raonem wanem olketa savve duim for helpem olketa brata and sista.”

Wanem nao best wei Olketa Jehovah’s Witness savve helpem olketa brata and sista blo olketa wea garem need? Hem no for sendem selen stret go lo wanfala branch office lo nara kantri, bat for givim donation for waka raonem world. Olketa savve putim donation lo contribution box blo kongregeson for “Waka Raonem World” or go lo donate.jw.org. Mifala tinghae lo evri donation hia.