Oil Palm—Tree Wea Garem Staka Way for Iusim

From man wea raet for Wekap! long Solomon Islands

GUADALCANAL—long planti pipol nem hia join withim olketa barava big faet bilong World War II. But distaem, eniwan wea kam back long disfala ples long Solomon Islands wea olketa faet bifor bae faendem different samting—staka laen, no bilong olketa soldia, but bilong olketa maeti oil palm tree.

Graon underneath olketa naesfala and maeti oil palm tree hia wantaem fulap withim staka leftova bomb and nara nogud samting bilong war. But olketa aotem finis olketa samting hia bilong war for mek-ready for olketa oil palm. Hao nao olketa startim way for plantim disfala tree? And why nao iumi savvy say staka way stap for iusim disfala naesfala maeti tree?

Bigfala Story Bihaenem

Firstfala record wea storyim tree wea maet hem oil palm kamap long mek-15 century wea man bilong Venice, Alvise Ca’da Mosto, wea go raonem west coast bilong Africa hem raetem. Then, samting olsem 500 year go nomoa, olketa slave bilong Africa tekem fruit hia go long olketa kantri akros long Atlantic. So palm oil hem kamap olsem wanfala long olketa vegetable oil wea staka iusim distaem. Insaed wan acre, oil palm savvy givim moa oil winim eni nara plant wea givim oil. And tu, oil palm hem wanfala tree wea garem fruit olowe for olsem 25 go kasem 30 year.

Wanfala important samting for workim palm oil, wea barava tru long olketa land long Far East, hem samting wea olketa faendem samfala year bifor 1980. Bifor, olketa tingsay wind nao karim raon seed bilong oil palm. Dastawe, sapos olketa fruit no grow gud, olketa say weather nao hem spoelem. But, olketa niufala research showimaot hao olketa insect nao main wan wea karim raon seed! So taem olketa tekem olketa insect wea savvy karim seed, from West Africa go long Far East, hem barava work gud nao.

Disfala red and orange fruit savvy mekem tufala kaen oil. Olketa iusim tufala evriwan insaed olketa different samting, wea maet iu tu iusim samfala. Bifor iumi lukim diswan, letem iumi visitim firstaem wanfala palm oil factory and lukim hao olketa aotem oil.

Aotem Datfala Gold Wata

Taem mifala kasem factory, tour-gaed hello long mifala and tekem mifala insaed. Evriwea raonem mifala bigfala machine go ahed for work. First step for aotem oil from fruit, hem say, hem for putim fruit insaed bigfala raon steam oven. Evri bunch garem samting olsem 200 fruit wea klosap sem size olsem betelnut. Steam oven hem klinim gud olketa fruit and mekem fruit slak lelebet from bunch.

Nextfala samting, olketa iusim wanfala machine wea olketa kolem stripper for aotem olketa fruit from bunch. Then olketa sendem fruit wea olketa aotem go long wanfala bigfala blender, wea aotem skin bilong fruit from nut insaed. Then olketa skuisim disfala skin bilong fruit insaed wanfala bigfala press for kasem fresh palm oil. Bihaen olketa klinim and klinim moa, palm oil hem ready nao for export.

But mek-tu kaen oil hem stap. Diswan kamaot from nut. Olketa mas brekem firstaem nut bilong oil palm for kasem soft seed insaed. Bihaen diswan, olketa skuisim soft seed hia for aotem naesfala wata. Olketa kolem diswan palm-seed oil.

Samting wea leftova bihaen olketa skuisim bae gogo kamap naesfala kaikai for olketa animal. Olsem tu, bihaen olketa aotem olketa fruit bilong hem, olketa putim back bunch long plantation olsem kaikai for graon. Olketa iusim tu leftova skin and meat bilong fruit olsem firewood for olketa machine wea workim steam. Evri part hia work gud tumas!

From Ice Cream Kasem Face Cream

Palm oil hem mek-tu oil bihaen long soybean oil wea pipol iusim long world. The World Book Encyclopedia say olsem: “Long mek-17 century, olketa bilong England iusim palm oil olsem medicine and hand cream.” But, distaem, iu savvy faendem insaed ice-cream, butter, oil for kuki, and nara samting olsem soap and mekap.

Olketa iusim palm-seed oil tu for workim butter, chocolate and narafala kaen lole. But planti way moa stap for iusim oil. Bihaen olketa work moa long palm oil and palm-seed oil, samfala part savvy kamap tu insaed long samfala medicine, soap, washing powder, kandol, and explosive tu!

Tru nao, oil palm hem grow gud tumas long Solomon Islands. Hem no small samting sapos iu tingim hao 13 percent long export bilong kantri hem kam from disfala tree.

Taem iumi luk ap long wanfala oil palm, bae iumi sapraes for tingim hao part long disfala fruit maet pas long saed long mouth bilong wanfala pikinini olsem ice-cream and tu long face bilong mami bilong hem, insaed mekap. Tru nao, oil palm hem wanfala tree wea garem staka way for iusim, and iumi savvy thankiu long nambawan fruit bilong hem.

[Box/Piksa long page 21]

Tufala Ton Wan Day Bae Hand

Duf . . . duf. Duf . . . duf! Noise bilong bunch fruit wea fall daon taem olketa workman long plantation harvestim olketa oil palm kamap evriwea. Hao nao olketa kasem fruit taem hem hae ap tumas insaed olketa tree?

Olketa iusim sharpfala raon naef wea stap long end bilong iron-stik wea long tumas, olketa man for harvest iusim diswan for katem fruit from olketa tree wea savvy hae olsem wanfala foa-story building. Insaed wan day, evri workman bae harvestim maet 80 go kasem 100 bunch fruit and karim go long saed road for olketa pikimap. Sapos iu tingim hao wanfala bunch hem 25 kilogram, hem big work nao for liftimap evriwan hia! Foa and haf ton bilong fruit bae workim wan ton bilong palm oil.