Young Pipol Askim . . .

Hao Nao Mi Savvy Deal Withim Pipol Wea Tokdaonem Mi?

YOUNG pipol wea wearim kaleko or luk different from olketa fren savvy suffer from nogud way for tokdaonem man. Diswan hem tru long olketa young Kristian, wea fasin bilong olketa hem barava different from olketa nara young pipol. Kraest talem diswan long olketa tru follower bilong hem: “Sapos olketa persecutim mi, bae olketa persecutim iufala tu.”—John 15:20.

Hao nao diswan affectim olketa young Witness Bilong Jehovah? Samfala long olketa suffer bikos olketa no celebratim samfala holiday; samfala tokspoelem olketa bikos olketa no salutim flag. Planti long olketa kasem hard taem bikos olketa no iusim nogud drug, and bikos olketa tinghae long standard bilong Bible saed long fasin.

Diswan hem no niu samting. For tok stret, aposol Peter talem olketa Kristian wea stap long first century: “From iufala no go ahed for followim [pipol bilong olketa nation] . . . , olketa konfius and go ahed for tok nogud abaotem iufala.” (1 Peter 4:4) Samfala nara transleson say, olketa “kolem enikaen nem long iufala” (Knox) or, “Olketa tokspoelem iufala.”—Today’s English Version.

Waswe, eniwan tokspoelem iu bikos long religion bilong iu? Sapos olsem, garem strong. Planti face-im diskaen fasin! And bae iu hapi for savvy iu fit for deal withim nogud feeling wea kam taem pipol tokdaonem iu bikos long faith bilong iu.

Why Olketa Tok Nogud

Why nao samfala mekfan long pipol wea garem belief and way wea different from olketa seleva? Samfala taem pipol wea tokspoelem man—olsem olketa man wea raf—olketa no mas hapi. Olketa maet mekfan long iu for apim way bilong olketa seleva long eye bilong olketa fren. Taem olketa stap seleva, maet fewfala nomoa long olketa man for mekfan olsem bae interest—or garem strong—for tok againstim iu.

Long narafala saed, olsem Peter raetem, samfala man for tok spoelem man, olketa “konfius.” Olketa maet barava sapraes long fasin bilong iu. For example, sapos iu wanfala Witness bilong Jehovah, olketa maet tingsay hem ova tumas for iu no share insaed olketa samting wea join withim samfala holiday. Olketa maet herem liar story from olketa man wea strong for againstim iumi.

Nomata wanem nao kosim diswan, iu maet agree withim wise toktok bilong Bible: “Toktok bilong man wea tok olabaot hem olsem sword wea katem man.” (Proverbs 12:18) But remember hao olketa man wea go ahed long diskaen toktok maet duim olsem no from olketa no laekem iu. Maet olketa duim stret wanem wise toktok bilong Bible say—olketa “tok olabaot.”

Nomata olsem, way for tokspoelem man savvy pain, olsem kill long body. Iu maet kasem test for brekem faith bilong iu for stopem nogud toktok bilong olketa. So hao nao bae iu deal withim way wea olketa tokdaonem iu from belief bilong iu?

Ready for Givim Ansa

Aposol Peter encouragim olketa Kristian: Evritaem “ready for givim ansa long eniwan wea askim reason for hope wea iufala garem, but duim datwan withim humble fasin and bigfala respect.” (1 Peter 3:15) For givim ansa for faith bilong iu, iu needim stretfala savvy and for meanim gud evri reason for olketa belief bilong iu.

But, iu mas learnim tu hao for explainim iuseleva long narafala pipol withim “bigfala respect” or, olsem The Bible in Basic English hem say, “no withim praod fasin.” Savvy bilong iu long Bible and olketa teaching bilong hem mas no mekem iu feel moa hae winim narafala pipol. But long way wea different, iu mas trae for mekem grow tingting bilong aposol Paul, wea raet olsem abaotem ministry bilong hem: “Mi mekem miseleva kamap slave long evriwan, mekem mi savvy winim staka man.”—1 Corinthians 9:19.

Sapos iu fraet for givim ansa for faith bilong iu, no lus hope. Planti young Witness garem sem feeling. “Taem mi long Primary skul,” Jamal hem say, “Mi no savvy hao for explainim long nara pipol why nao mi no celebratim olketa holiday or salutim flag or why mi go aot long door-tu-door ministry tu.” Wanem nao helpem hem? “Dadi bilong mi go ahed for work withim mi go-go mi savvy nao hao for explainim olketa samting, and diswan barava helpem mi.” Sapos hem hard tumas long iu for explainim olketa belief bilong iu long narafala pipol, maet iu savvy askim help bilong mami and dadi or narafala mature member bilong Kristian kongregeson for helpem iu meanim gud savvy bilong God.—Ephesians 3:17-19.

Wanfala young Witness girl wea hem 16-year say hao wanfala Bible study program bilong hemseleva helpem hem for no fraet for tokaot long skul. “Bifor, taem olketa skulfren bilong mi trae for mekem mi feel shame from mi wanfala Witness, mi no savvy wanem nao for talem,” hem say. “Distaem, olsem wanfala man for talemaot gud nius wea work full-taem, mi duim moa study long Bible, and mi savvy hao for givim ansa nao. Way for no missim evri niu Wastaoa and Wekap! magasin hem helpem mi for story gud long olketa skulfren bilong mi abaotem olketa belief bilong mi.”

Hem tru, evri problem hem different. So different problem bae garem different way for deal withim. But, taem wanfala nogud toktok mekem iu feel kros, hem no stret for “peim back nogud samting withim nogud samting.” (Romans 12:17-21) Wanfala raf ansa, nomata iu maet iusim long kleva way, bae mekem way for tokdaonem man kamap big. Dastawe samfala pipol luksavvy hem moabeta for no worry nomoa long nogud toktok for spoelem man.

Long samfala taem, olsem taem samwan trae toktok long funny way nomoa, hem maet wise for laf nomoa long toktok olsem winim way for feel nogud long hem. (Ecclesiastes 7:9) Sapos man for tokdaonem man lukim hao olketa toktok bilong hem no savvy duim eni samting, hem maet stop for spoelem.—Markem Proverbs 24:29; 1 Peter 2:23.

Tokaot

But, samfala taem stap wea iu maet savvy explainim lelebet olketa belief bilong iu long kaenfala way. Wanfala girl wea hem 13-year-old traem olsem and nambawan samting nao kamaot from diswan. Hem say: “Mi wakabaot go long class taem samfala student start for mekfan abaotem Olketa Witness Bilong Jehovah. Mi want for tokaot, but olketa ranawe and go ahed for laf long mi—wanfala nomoa no duim olsem.” Witness girl hia explainim: “Wanfala girl wea nem bilong hem Jamee kam long mi and talem mi hao hem garem buk You Savvy Stap Olowe long Paradaes long Earth.a Hem say hem readim finis big haf long diswan and hem interest for kasem moa information abaotem olketa belief bilong iumi. Mi start for studyim Bible withim Jamee.” From experience encouragim hem, young Witness hia start for story long narafala young pipol. “Mi visitim evritaem fofala student wea showimaot interest and wea mi sure bae kwiktaem study,” hem say.

Samfala year bifor wanfala student bilong Liberia, wanfala kantri long Africa, garem semkaen experience. Long taem bilong wanfala study abaotem olketa way and living bilong pipol, hem explainim long way wea showimaot respect hao, olsem wanfala Witness bilong Jehovah, hem believe long creation no long evolution. Firstaem, planti skulfren bilong hem againstim hem tumas. But teacher letem hem explainim olketa belief bilong hem front long class and bihaen disfala teacher acceptim buk Life—How Did It Get Here? By Evolution or by Creation?b

Bihaen hem readim disfala buk, teacher hia talem class: “Disfala buk barava spesel evribit. Hem wanfala long olketa best buk bilong science wea mi readim.” Then teacher hia say hao hem want for iusim tugeta Creation buk withim olketa textbuk bilong class insaed tufala skul term bihaen and hem talem evriwan long class for tekem wanfala buk from disfala Witness Student. Olketa tekem staka buk, and planti student changim tingting bilong olketa abaotem Olketa Witness Bilong Jehovah!

Faith wea Kasem Test Hem Wanfala Strong Faith

Hem tru, samfala taem iu maet feel weakdaon from staka pipol no followim—or hapi withim—living bilong iu wea kam from Bible. (Markem Psalm 3:1, 2.) Dastawe, hem wise for lukaotem way for kaban tugeta withim olketa wea garem sem belief olsem iu. (Proverbs 27:17) But waswe sapos no eni young pipol garem sem faith olsem iu long skul bilong iu or area bilong iu?

Sapos olsem, remember hao barava nambawan fren bilong iu nao Jehovah God, and hem savvy supportim iu. Hem nao main wan wea Devil Satan hem tokdaonem for planti thousand year finis. So iumi savvy sure hao way wea iu stand strong for faith bilong iu hem mekem heart bilong Jehovah hapi. Diswan hem wanfala chance for hem ‘givim ansa long dat wan wea tokdaonem hem.’—Proverbs 27:11.

Hem samting for expectem hao samfala taem faith bilong iu bae kasem test. (2 Timothy 3:12) Nomata olsem, aposol Peter remindim iumi hao faith wea kasem test hem “winim price bilong gold wea savvy finis nomata olketa testim long fire.” (1 Peter 1:7) So, taem olketa tokspoelem iu from faith bilong iu, ting long hem olsem wanfala chance for strongim faith bilong iu and for showimaot fasin for stand strong. Aposol Paul raetem hao fasin for stand strong lead go long “way for God acceptim iumi.” (Romans 5:3-5) Yes, feeling for want for mekem Jehovah hapi long iumi savvy givim man strongfala tingting for win taem olketa tokdaonem iu from faith bilong iu!

[Olketa footnote]

[Piksa long page 21]

Waswe, iu savvy givim ansa for faith bilong iu?