Tingting Bilong Bible
Waswe, Evri Religion Difren Road wea Lead Go Long God?
“MI FAENDEM hard tumas for bilivim hao God bilong full universe hem chusim wanfala religion nomoa for savve long hem,” datwan nao toktok bilong man for raet Marcus Borg. Man wea winim Nobel Peace Prize, Desmond Tutu sei: “No eni religion savve sei hem garem full truth abaotem secret” bilong faith. Wanfala main tingting bilong olketa Hindu hem “Jotto moth, totto poth,” wea minim evri religion olsem difren road wea lead go long sem goal. Olketa Buddhist tu garem disfala tingting. Tru nao, planti million pipol biliv evri religion olsem difren road wea lead go long God.
Man for raetem history, Geoffrey Parrinder sei: “Samfala taem pipol sei evri religion garem sem goal, or olketa sem wei wea lead go long truth, or olketa sei tu hao olketa garem sem teaching.” Tru nao, olketa teaching, kastom, and god bilong olketa religion klosap semsem. Planti religion story abaotem love and sei wei for kill, steal, and laea hem rong. Long planti religion, samfala barava waka hard for helpem nara pipol. So, sapos man garem strong biliv and trae for garem gudfala living, waswe, hem important wanem religion nao hem insaed? Or waswe, evri religion olsem difren road wea lead go long God?
Strong Biliv Nomoa—Hem Inaf?
Tingim example bilong Jew man wea stap long first century wea nem bilong hem Saul, wea bihaen kamap Christian aposol Paul. Hem man wea strong for followim Jew religion, and diswan leadim hem for trae for aotem worship wea olketa follower bilong Christ duim, worship wea hem tingse no stret. (Acts 8:1-3; 9:1, 2) Bat thru long mercy bilong God, Saul luksavve pipol wea strong tumas long religion olsem hemseleva maet strong for God, bat from olketa no savve long full truth, maet olketa rong nao. (Romans 10:2) Taem Saul lane moa abaotem will and fasin bilong God, hem change and start for worship witim olketa wea hem bin persecutim—olketa follower bilong Jesus Christ.—1 Timothy 1:12-16.
Waswe, Bible sei staka biliv nao stap for iumi chusim and datwan wea iumi chusim bae gud nomoa witim God? Aposol Paul kasem instruction from Jesus Christ wea resurrect wea talem barava difren samting. Jesus sendem hem go long pipol bilong olketa nation “for openem eye bilong olketa, for tanem olketa from darkness go long laet and from paoa bilong Satan go long God.” (Acts 26:17, 18) Tru nao, religion wea iumi chusim hem important. Planti pipol wea Paul mas go long olketa garem religion finis. Bat olketa stap insaed “darkness.” Tru nao, sapos evri religion olsem difren road nomoa wea lead go long laef olowe and God hapi long olketa, no eni need stap for Jesus trainim olketa follower bilong hem for duim waka for mek-disaepol wea hem komandim olketa for duim.—Matthew 28:19, 20.
Long Sermon bilong hem long Maunten, Jesus sei: “Go insaed long smolfala gate; bikos road wea lead go long dae hem big tumas and waed, and planti pipol nao go insaed long hem; bat gate hem smol and road hem taet wea lead go long laef, and samfala nomoa faendem.” (Matthew 7:13, 14) Bible talemaot stret hao “wanfala faith” nomoa stap. (Ephesians 4:5) Tru nao, planti wea stap long datfala “waed” road garem religion finis. Bat olketa no garem “wanfala faith.” Bikos wanfala trufala wei for worship nomoa stap, olketa wea laek for faendem trufala faith mas lukaotem datwan.
Lukaotem Trufala God
From start long history bilong man, God talem olketa man samting wea hem laekem olketa for duim. (Genesis 1:28; 2:15-17; 4:3-5) Long distaem Bible showimaot klia olketa mark bilong hem. Diswan mekem iumi fit for luksavve long worship wea hem acceptim and no acceptim. (Matthew 15:3-9) Samfala pipol born insaed religion bilong olketa, bat olketa narawan followim nomoa samting wea planti pipol long ples bilong olketa duim. For planti pipol, religion wea olketa garem hem depend long wanem taem and wea nao olketa born. Bat waswe, religion wea iumi chusim hem shud samting wea iu seknomoa long hem or letem narawan nao disaedem for iu?
Religion wea iu chusim hem shud samting wea iu duim bihaen iu garem savve wea garem faondeson long Bible. Long first century, samfala pipol wea garem big education no acceptim nomoa samting wea aposol Paul talem. Olketa “lukluk gud long olketa Scripture evriday for pruvim evri samting hia.” (Acts 17:11; 1 John 4:1) Hem gud tumas sapos iu duim sem samting tu.
Bible storyim hao God bilong universe hem lukaotem pipol for worshipim hem long truth. Long John 4:23, 24, Jesus sei: “Hour bae kam, and hem kam finis, wea olketa trufala worshiper bae worshipim Dadi witim spirit and truth, from Dadi hem lukaotem pipol olsem for worshipim hem. God hem wanfala Spirit, and olketa wea worshipim hem mas worship witim spirit and truth.” Worship wea hem acceptim nomoa hem “worship wea klin and no dirty front long God and Father bilong iumi.” (James 1:27) God blessim planti million pipol wea lukaotem smol road wea lead go long laef. Hem bae no givim laef olowe long olketa wea no kea, bat hem bae givim long olketa wea waka hard for faendem smol road wea hem putim and then followim datwan.—Malachi 3:18.