Heit Spread Evriwea Long World
WANFALA bigfala wild animal gogo raon—bigfala wild animal wea olketa kolem heit. And hem kakamap big tumas evriwea long world.
Long wanfala Balkan kantri wanfala province still safa long samting wea kamaot from ethnic kill-kill wea kamap no longtaem go nomoa. Fasin for enemy wea go ahed for planti handred year lead go long olketa bigfala wei for kill-kill, rape, aotem pipol from kantri, wei for bonem and stealim olketa haos and vilij, distroem olketa garden and animal, and hangre. Staka bomb still stap long graon.
Long East Timor, Southeast Asia, 700,000 pipol mas ranawe from olketa fraetem wei for kill-kill, hitim man, sutsut olabaot, and wei wea pipol mas ranawe from ples bilong olketa. Olketa lusim nao ples wea olketa militant spoelem. Wanfala man hem sei: “Mi feel olsem wanfala animal wea man ronem.”
Long Moscow wanfala bomb wea bosta distroem wanfala building. Body bilong 94 pipol wea nating duim eni rong—samfala pikinini tu—stap olabaot long datfala ples. Winim 150 nao garekil. From olketa feel fraet bihaen disfala nogud samting happen, pipol askem, ‘Hu nao bae next wan for kasem disfala samting?’
Long Los Angeles, California, wanfala man for heitim pipol from difren color skin sut go long wanfala grup bilong olketa pre-skul Jew pikinini and bihaen hem killim dae wanfala Filipino man wea waka long post office.
Hem fitim for sei fasin for heit hem samting wea kamap evriwea long world. Klosap evriday, nius report talemaot samting wea happen taem heit midolwan pipol bilong difren color skin, tribe or religion join witim fasin for brekem law. Iumi lukim olketa nation, community, and famili brekdaon. Iumi lukim olketa kantri join long wei for killim dae pipol from wanfala tribe or ples. Iumi lukim olketa barava nogud samting wea olketa duim long samfala pipol bikos olketa tingse olketa “difren.”
Sapos iumi bae savve kasholem datfala bigfala wild animal wea olketa kolem heit, iumi mas luksavve long botom bilong raf fasin wea fulap witim heit. Waswe, fasin for heit hem samting wea stap finis insaed blood bilong man? Waswe, hem fasin wea pipol lanem? Waswe, hem fitim for stopem fasin for heit?
[Credit Line long page 3]
Kemal Jufri/Sipa Press