Sekson wea Garem Wan Mind No Seksek
FROM MAN WEA RAET FOR WEKAP! LONG EL SALVADOR
LONG 11:34 LONG MORNING BILONG JANUARY 13, 2001, WANFALA EARTHQUAKE WEA BIG BILONG HEM 7.6 LONG RICHTER SCALE HEM SEKEM FULL KANTRI BILONG EL SALVADOR, AND OLKETA LONG PANAMA GO KASEM MEXICO FEELIM TU. STAKA BAE HARD FOR FIRGETIM SAMTING WEA OLKETA DUIM TAEM DATWAN HEM HAPPEN.
“TAEM bigfala seksek hem katdaon, mifala luk go ap and lukim hed bilong maunten hem brek, and then luk olsem hem nating muv for tu-thri second,” hem nao samting wea Miriam Quezada rememberim. “Dota bilong mi singaot big, ‘Mami! Ran! Ran!’ ” Then wanfala saed bilong datfala maunten hem slide go daon for olketa. Samting olsem 500 pipol long Las Colinas community bilong Nueva San Salvador, or Santa Tecla lusim laef bilong olketa, and samting olsem 300 haos nao distroe evribit.
“Mi just lusim haos and weit long bas stop taem earthquake hem happen,” Roxana Sánchez hem sei. “Taem seksek hem stop, mi helpem wanfala woman for pikimap olketa basket bilong hem and mi ting, ‘Mi mas go bak long haos bikos famili bilong mi bae wari abaotem mi.’ ” Taem Roxana tan long kona, hem lukim big hip graon hem kavarem street bilong hem. Haos bilong hem lus nao!
Kwiktaem Givim Help
Total namba bilong olketa Witness long El Salvador hem winim 28,000, and planti thousand stap long datfala disaster area—long saed sea bilong Salvador. Nomata olketa safa yet from nogud samting wea kasem olketa, planti kwiktaem start for tingim need bilong nara pipol. Mario Suarez, wanfala traveling overseer bilong Olketa Jehovah’s Witness wea serve long Santa Tecla, hem sei: “Samting olsem wan hour bihaen datfala earthquake, mi kasem wanfala kol for givim help. Olketa sei samfala Christian brata and sista still stap insaed haos bilong olketa and no savve kamaot. Stretawe mifala organizem wanfala grup bilong olketa volunteer.
“Mifala tingse maet samfala wall nao foldaon and bae mifala aotem nomoa rabis and openem wei for olketa wea insaed for kamaot. Bat no eniwan long mifala luksavve hao big nao datfala disaster. Tru nao, taem mifala go kasem datfala area, mifala askem wea nao olketa haos hia stap. Mifala seke fogud taem olketa sei mifala standap antap long olketa! Graon wea thri meter hae kavarem olketa haos hia go kasem mek-tu story. Hem nogud samting tumas!”
Taem hem gogo for aftanun, samting olsem 250 Witness from olketa kongregeson klosap kam long datfala area for help. Olketa volunteer iusim pik, shovel, plastic container, and hand nating for trae kasem pipol wea graon berem. Bat, olketa faendem samfala nomoa wea laef long Santa Tecla. Insaed planti handred wea dae—bikos no eni air for breathim or graon hem foldaon antap long olketa—faevfala nao Olketa Jehovah’s Witness.
Organizem Relief Waka
Long full kantri, olketa kongregeson bilong olketa Witness join insaed long relief waka. Long Comasagua, Ozatlán, Santa Elena, Santiago de María, and Usulután, planti Witness lusim haos bilong olketa. Olketa iusim olketa Kingdom Hall and haos bilong pipol olsem kolekson center. “Staka nao saportim disfala waka,” wanfala traveling overseer, Edwin Hernández hem talem. “Olketa brata kam witim kaikai, kaleko, mattress, medicine, and selen tu for funeral bilong olketa wea dae.”
Relief komiti wea branch office bilong Olketa Jehovah’s Witness mekem hem arrangem for olketa grup bilong kongregeson wea earthquake no spoelem tumas for lukaftarem need bilong olketa wea earthquake barava spoelem. Olketa markem olketa grup bilong 10-fala go kasem 20-fala Witness for fixim olketa haos.
For join witim datwan, olketa Regional Building Komiti bilong Olketa Jehovah’s Witness, wea savve arrangem wei for buildim olketa Kingdom Hall, organizem olketa grup for buildim temporary haos for olketa wea haos bilong olketa distroe evribit. Price bilong kapa long El Salvador barava go ap hae, so branch office bilong Olketa Jehovah’s Witness long Guatemala kaen tumas for donatem staka kapa. Olketa branch office long United States and Honduras nao givim kam timba for frame bilong olketa haos hia.
Nomata olketa waka hia go ahed, olketa smolsmol earthquake go ahed tu. Olketa full community sleep long saed road anda long olketa plastic and old kaleko. Pipol barava fraet. Kasem February 12, olketa recordim total bilong 3,486 smolsmol earthquake wea kam bihaen.
Mek-tu Big Earthquake
Long February 13, 2001, long 8:22 long morning, wan month bihaen firstfala earthquake, mek-tu earthquake hem kamap long midol bilong El Salvador, wea big bilong hem 6.6 long Richter scale. Kwiktaem nomoa help and relief waka bilong Olketa Jehovah Witness go ahed moa. Wanfala elder wea nem bilong hem Noé Iraheta sei: “Evri Kongregeson Buk Study conductor go lukaotem olketa Witness long grup bilong hem for mek sure evriwan stap sef.”
Tufala big taon bilong San Vicente and Cojutepeque and olketa area raonem tufala nao barava nogud. Olketa taon bilong San Pedro Nonualco, San Miguel Tepezontes, and San Juan Tepezontes distroe evribit. Long Candelaria, Cuscatlán, wea klosap evri samting spoel, wanfala skul hem foldaon and killim dae winim 20 pikinini. Salvador Trejo, wanfala Witness long there sei: “Samting olsem wanfala hour bihaen, mi herem wanfala voice from street hem singaot olsem, ‘Brata Trejo!’ Firstaem mi no savve lukim eni samting bikos long dust. Then, seknomoa, olketa Witness from Cojutepeque kam. Olketa kam for faendaot hao nao mifala!”
Olketa kongregeson wea stap klosap organize moa for givim need bilong olketa wea disfala mek-tu disaster spoelem. Olketa followim example bilong olketa Christian long Macedonia long first-century wea ask strong for privilege for givim samting, nomata olketa seleva tu garem need. Olsem example, olketa brata long olketa kongregeson long taon bilong Santiago Texacuangos, wea lusim planti samting long first earthquake, olketa redyim hot kaikai for tekem for olketa brata bilong olketa long San Miguel Tepezontes wea stap klosap.
Olketa sei total bilong winim 1,200 pipol nao dae long olketa earthquake long El Salvador, and nara eitfala dae long Guatemala wea stap klosap.
Tinghae Long Hard Waka
Olketa nara relief grup tinghae tumas long relief waka bilong olketa Witness for helpem pipol. Wanfala trak bilong National Emergency Komiti arrive for givim samfala supply long wanfala Kingdom Hall wea olketa iusim olsem shelter. Wanfala bilong olketa sei: “Long evri shelter wea mifala visitim, diswan nao hem first wan wea barava followim order. Mi laek for praisem iufala!” No eniwan long there hem ran go hipap raon long trak or pushpush olsem long olketa narafala shelter. Tru nao, olketa letem olketa olo nao for go firstaem for kasem olketa donation.
Olketa Witness no duim relief waka for olketa wea garem sem biliv nomoa. Olsem example, long San Vicente, planti wea no Witness go haed long area bilong Kingdom hall. “Hia long Kingdom Hall bilong Olketa Jehovah’s Witness,” Regina Durán de Cañas sei, “olketa pipol garem barava kaen heart. Olketa openem gate bilong olketa and sei, ‘Kam insaed!’ so mifala stap nao. Nomata long naet tu olketa duim security for mifala taem mifala sleep.”
Arrangement for Olketa Haos
Bihaen olketa lukluk long damage, olketa sendem information long branch office wea showimaot need for wakem olketa haos. Olketa start for buildim temporary haos for olketa wea lusim haos bilong olketa. And tu olketa fixim olketa haos wea damage nomoa. Planti nao interest long olketa construction team wea waka gud and waka hard, and olketa neiba kam for lukluk taem olketa waka.
Wanfala woman, wea tingse olketa wakman hia hem olketa sekson bilong taon wea kam for help, hem kam for komplen hao no eniwan kam long hem for kliarem haos bilong hem wea pisis. Olketa neiba pikinini sei: “Nomoa, olketa hia no sekson bilong taon. Olketa from Kingdom!” Narafala man wea no Witness, Moisés Antonio Díaz sei olsem: “Hem gud samting tumas for lukim hao Olketa Jehovah’s Witness helpem pipol wea garem need. Diswan hem organization wea garem wan mind and mifala thankiu long God bikos olketa kaen tumas for helpem mifala poor pipol. Mi waka finis witim olketa and mi laek for go ahed for duim olsem.”
Wanfala Christian sista wea olketa wakem temporary haos for hem go ahed for krae taem hem sei: “Mi and hasband bilong mi no garem eni word wea fit for talemaot thankiu bilong mifala—firstaem long Jehovah and then long olketa brata hia wea, nomata olketa no savve long mifala, olketa kam kwiktaem for helpem mifala.”
Kasem midol long April, olketa Witness wakem 567 temporary haos for olketa wea earthquake spoelem haos bilong olketa, and samting olsem 100 famili tu kasem building material for fixim haos bilong olketa wea damage. Taem olketa famili wea garem need garem door for lokim and ruf for protectim olketa, olketa Witness start nao for fixim or buildim moa 92 Kingdom Hall wea spoel.
Buildim Moa Olketa Laef
For join witim wei for buildim moa olketa building and haos, planti tinghae tumas long help wea olketa kasem for kamap strong long spiritual wei and saed long feeling.
“From olketa smolsmol earthquake go ahed tu, samfala taem mi feel fraet tumas, bat olketa brata evritaem showimaot love and encouragem mi,” Miriam wea iumi story abaotem finis hem talem. “Bae mifala hao sapos olketa brata no stap!”
Loving kea bilong Jehovah thru long kongregeson hem muvim olketa wea earthquake spoelem long wei wea mekem iumi sapraes. Long Comasagua klosap evri Witness haos damage or distroe long firstfala earthquake. Nomata olsem, 12-fala bilong 17-fala Witness long there join insaed full-taem ministry long April and May, and bihaen 2-fala kamap regular pioneer.
Olketa kongregeson long area bilong Cuscatlán, wanfala area wea mek-tu earthquake barava spoelem, garem spesol assembly day bilong olketa long March. Namba wea attend hem 1,535 wea big winim eni assembly bifor, and 22 nao baptaes. Nomata planti wea attend just lusim haos bilong olketa, olketa donatem bigfala selen for Assembly Hall, wea mekem olketa wea organizem assembly barava sapraes.
Wanfala Witness from San Vicente talem disfala toktok wea planti tu tingim: “Mi readim insaed olketa pablikeson hao organization hem help long taem bilong disaster, bat distaem miseleva kasem datwan, and mi feelim saport bilong sekson bilong olketa brata. Mifala lukim Christian love hem waka. Hem wanfala spesol privilege for insaed long disfala sekson wea garem wan mind!”
[Piksa long page 17]
Landslide wea earthquake hia kosim berem winim 300 haos long Las Colinas
[Credit Line]
Botom bilong page 17-9:Courtesy El Diario de Hoy
[Piksa long page 18]
Olketa long vilij iusim pik, shovel, and baket long waka for givim help
[Credit Line]
Courtesy of La Prensa Gráfica (photograph by Milton Flores/Alberto Morales/Félix Amaya)
[Piksa long page 19]
Kingdom Hall long Tepecoyo wea pisis
[Piksa long page 20]
Olketa brata long Tepecoyo stretawe wakem wanfala shelter for duim olketa meeting insaed
[Olketa piksa long page 20]
Olketa Witness kwiktaem buildim moa olketa Kingdom Hall and buildim winim 500 temporary haos
[Piksa long page 20]
Wanfala singol mami and dota bilong hem lukluk taem olketa buildim moa haos bilong hem wea damage