Police—Future Bilong Olketa Bae Waswe?
SAPOS no eni police stap, no eni law and order bae stap. Bat nomata police stap, waswe, world hem sef? Long staka ples distaem, pipol barava warim security. Waswe, iumi savve depend long police for protectim iumi from olketa criminal? Waswe, iumi savve hope for police mekem ples bilong iumi sef? Waswe, bae olketa winim faet againstim criminal fasin?
Insaed buk bilong hem Police for the Future, David Bayley talem wanfala idea: “Police no stopem crime. . . . Tru nao, police olsem plaster antap long wanfala cancer. . . . Nomata olketa waka hard for stopem crime, iumi kanduit depend long police for sevem community from crime.” Samfala study showaot hao thrifala main waka bilong police—gardim olketa street, ansarem olketa emergency kol, and faendem criminal—olketa no stopem crime. Why nao olsem?
For trae stopem crime long wei for garem moa police bae kostim staka selen. Luk olsem olketa criminal nating wari sapos moa police stap. Hao fast police ansarem kol for help no affectim namba bilong olketa crime tu. Police reportim hao sapos pipol kol for help and police no kasem there insaed wan minute, bae hard for olketa kasholem datfala criminal. Luk olsem olketa criminal savve long diswan. And wei for investigate hem no help tu. Nomata olketa win for putim criminal long prison, datwan no stopem criminal fasin. United States hem garem moa prisoner winim eni nara kantri, bat staka crime go ahed for happen; long narasaed, Japan, wea no staka pipol insaed prison, garem barava low crime. Olketa project olsem wei for olketa neiba security for each other no mas stretem problem, especially long olketa ples wea staka crime savve happen. Wei wea olketa targetim samfala crime olsem wei for baem and sellim drug hem barava katem daon datwan, bat olsem hem savve happen evritaem, hem hard for keepim olsem.
Police for the Future hem sei olsem: “Wei wea police no savve stopem criminal fasin hem no mekem pipol wea garem stretfala tingting for sapraes. Staka pipol luksavve hao living and wei bilong pipol, wea police and criminal justice system hard for kontrolem, affectim haomas crime nao kamap long community.”
Wanem Nao Bae Happen Sapos No Eni Police Stap?
Wanem nao iu duim taem no eni police lukluk? Waswe, iu mekius long datfala chance for brekem law? Hem sapraesing samting for lukim staka wea pipol respectim olketa putim nem and future bilong olketa long danger long wei for brekem law. The New York Times niuspepa reportim no longtaem go nomoa hao ‘olketa chargim 112 pipol wea insaed wanfala plan for giamanim olketa insurance company for trak. Insaed olketa hia hem olketa lawyer, medical doctor, chiropractor, wanfala physical therapist, wanfala acupuncturist, and wanfala wea waka long administration bilong Police Department.’
Nara bigfala case wea mekem rich pipol wea interest long art for seke, hem taem olketa bigman long olketa big bisnis olsem Sotheby’s bilong New York and Christie’s bilong London olketa guilty long wei for apim price long wei wea no stret. Olketa mas peim planti handred million dollar long fine and compensation! So, wei for greedy saed long selen hem problem bilong rich pipol tu.
Samting wea happen long Recife, Brazil, long 1997 taem police strike, showimaot wei wea staka pipol isi for duim criminal samting sapos no eniting blokem olketa. Eni biliv wea olketa maet garem saed long religion nating stopem olketa. Hem isi nomoa for olketa ting smol or lusim eni principle or biliv olketa garem. Dastawe iumi no sapraes hao police long staka kantri olketa stragol long samting wea bae hard for winim, long wanfala world wea isi tumas for brekem law, nomata long smol or big wei.
Long narasaed, samfala pipol obeyim olketa law bikos olketa respectim olketa wea garem hae paoa. Aposol Paul talem olketa Christian long Rome hao olketa shud obeyim olketa hae paoa wea God letem for stap, bikos olketa hia help for keepim order. Hem sei olsem abaotem olketa hae paoa: “Hem minister bilong God, for panisim man wea duim nogud samting. Dastawe, strongfala reason stap for iufala stap anda, no from datfala kros nomoa, bat from conscience bilong iufala tu.”—Romans 13:4, 5.
Living wea Go Ahed for Change
Tru nao, police mekem living moabeta. Taem drug and raf fasin lus from community, pipol trae hard for keepim datfala standard. Bat for tok stret, for changem community hem samting wea no eni police force fit for mekem kamap.
Waswe, iu savve tingim wanfala community wea, from pipol bilong hem barava respectim law, olketa no needim eni police? Waswe, iu savve piksarem long mind bilong iu wanfala world wea pipol barava kea long each other wea mekem evriwan willing for helpem neiba and no eniwan need for kolem police for help? Maet diswan here olsem wanfala dream. Bat disfala toktok bilong Jesus, nomata hem abaotem difren samting, hem barava fitim diswan. Hem sei: “Long olketa man diswan hem hard tumas, bat long God evri samting hem isi nomoa.”—Matthew 19:26.
Bible storyim wanfala taem long future wea evri man bae stap anda long wanfala gavman bilong Jehovah God. “God bilong heven bae startim wanfala kingdom . . . Hem bae smasem and finisim evri kingdom hia.” (Daniel 2:44) Thru long wei for teachim wei bilong love bilong God long evri honest pipol, disfala niu gavman bae finisim living wea kosim criminal fasin. “Earth bae fulap witim savve bilong Jehovah olsem wata hem kavarem sea.” (Isaiah 11:9) King bilong Jehovah, Jesus Christ, bae fit for stopem evri crime. “Hem bae no judge followim samting hem lukim or disaed followim samting hem herem; hem bae judgem olketa poor wan witim justice and defendim olketa hambol wan bilong earth witim stretfala fasin.”—Isaiah 11:3, 4, The New English Bible.
No eni criminal or crime bae stap. Bae pipol no needim eni police. Evriwan “bae sidaon anda long vine bilong hem and anda long fig tree bilong hem, and no eniwan bae mekem olketa seksek.” (Micah 4:4) Sapos iu laek for part bilong disfala “niu earth” wea Bible storyim, distaem nao hem taem for studyim wanem God hem promisim insaed Word bilong hem.—2 Peter 3:13.
[Blurb long page 12]
Waswe, iu savve tingim wanfala community wea, from pipol insaed barava respectim law, olketa no needim eni police?
[Blurb long page 12]
No eni criminal or crime bae stap
[Box/Piksa long page 11]
Police Againstim Olketa Terrorist
Olsem hem showaot from samting wea happen long September 11, 2001, long New York City and Washington, D.C., pipol for hijackim aeroplane and olketa terrorist mekem waka bilong police for protectim pipol hem barava hard. Distaem olketa garem olketa spesol team long staka kantri wea kasem training for kwiktaem go insaed and tekovarem wanfala aeroplane. Olketa lane tu hao for kwiktaem go insaed building—kamdaon from ruf long wanfala rope, jamp thru long window, and torowem bomb and tear-gas. Planti taem police wea kasem diskaen training win for kasholem olketa terrorist long wei wea no putim pipol insaed long danger.
[Credit Line]
James R. Tourtellotte/U.S. Customs Service
[Piksa long page 12]
Olketa samting wea pipol bae no needim insaed niu world bilong God