Tingting Bilong Bible

Waswe, God Bae No Tingim Olketa Wik Point Bilong Iumi?

‘Mi no wicked! Mi barava trae hard for lusim olketa nogud wei bilong mi, bat mi wik tumas!’

WASWE, iu or samwan wea iu savve long hem garem sem feeling? Planti pipol tingse hem hard tumas for winim olketa wik point saed long fasin. Samfala pipol depend long alcohol, tobacco, or olketa drug. Greedy fasin hem bossim living bilong planti nara pipol. And planti moa foldaon saed long sex, from olketa sei no eni hope stap for winim wei wea dirty fasin pullim olketa.

Olsem Matthew 26:41 showimaot, long kaenfala wei Jesus talemaot hao hem minim wik point bilong olketa man.a Tru nao, full Bible showimaot long kliafala wei hao Jehovah God and Jesus barava garem mercy for olketa man. (Psalm 103:8, 9) Bat waswe, fitim iumi for expectim dat God bae nating tingim evri wik point bilong iumi?

Moses and David

Tingim story abaotem Moses. Pipol savve long hem olsem man wea “garem kwaet fasin winim evri nara man wea stap antap long graon,” and hem trae hard for keepim datfala gudfala fasin. (Numbers 12:3) Taem olketa Israelite wakabaot thru long wilderness, planti taem olketa duim krangge samting and no showimaot respect long God and olketa wea stand for hem. Thru long evri samting here, Moses hambol for luk aotem direction bilong God.—Numbers 16:12-14, 28-30.

Bat, klosap long end bilong datfala gogo, hem no kontrolem nao kros bilong hem front long datfala full nation and no followim olketa instruction bilong God. God forgivim hem, bat waswe, datwan minim Jehovah bae letem hem for missim panis bilong diswan? Nomoa. Hem talem Moses: “Bikos iutufala no showimaot faith long mi . . . , iutufala bae no tekem disfala pipol go insaed land wea mi bae givim long olketa.” Moses bae no go insaed datfala Promis Land. Bihaen hem stragol for 40 year for kasem datfala nambawan privilege, wanfala serious wik point mekem hem for no kasem datfala reward.—Numbers 20:7-12.

King David tu hem man wea fraet long God and wea garem wik point. Wantaem hem letem strongfala feeling for duim sex winim hem and hem duim sex witim waef bilong narafala man. Then hem trae for haedem diswan taem hem mekem wei for olketa killim dae hasband bilong woman hia. (2 Samuel 11:2-27) Bihaen, hem barava feel sorre long nogud fasin bilong hem, and God forgivim hem. Bat David spoelem wanfala famili finis, and Jehovah no protectim hem from datfala bigfala trabol wea kam bihaen. Baby boy bilong David kasem bigfala sik, bat Jehovah no duim eni samting for hem, nomata David prea for saed bilong pikinini hia. Datfala boy hem dae, and bihaen datwan staka trabol moa kasem famili bilong David. (2 Samuel 12:13-18; 18:33) David kasem staka nogud samting from wei wea hem foldaon long wik point saed long fasin.

Tufala example hia showimaot hao olketa man mas kasem ansa for wanem olketa duim. Olketa wea want for servem hem mas waka hard for winim wik point long spiritual saed and kamap moabeta olsem wanfala Christian. Long first century, planti duim datwan.

Faet for Kamap Free From Sin

Pipol ting long Paul olsem wanfala gudfala example bilong Christian living. Bat waswe, iu savve hao hem mas faet evritaem againstim olketa wik point bilong hem? Romans 7:18-25 storyim klia disfala faet. Paul no wikdaon long faet bilong hem, from hem savve hao sin no savve stop.—1 Corinthians 9:26, 27.

Bifor olketa kamap Christian, samfala member bilong kongregeson long Corinth bifor garem fasin for duim rong. Bible sei bifor olketa hia man for ‘duim fornication, duim adultery, man wea leidaon witim man, man for steal, man wea greedy, man wea savve drunk.’ Bat hem talem tu hao olketa “kamap klin.” (1 Corinthians 6:9-11) Hao? Stretfala savve, Christian kaban, and spirit bilong God nao strongim olketa for stop from wei for duim wicked samting. Gogo, God talemaot hao olketa kamap raeteous long nem bilong Christ. Tru nao, God forgivim olketa, and from diswan olketa garem klinfala conscience.—Acts 2:38; 3:19.

Paul and olketa Christian long Corinth no ting smol long feeling bilong olketa for duim sin. Nomoa, bat olketa faet againstim, and witim help bilong God olketa win. Olketa first-century worshiper hia kamap gud tumas long fasin, nomata wanem nao stap raonem olketa and wei wea olketa no perfect. Waswe long iumi?

God Expectim Iumi for Faetem Olketa Wik Point Bilong Iumi

For faetem wanfala wik point maet no minim man hem winim evribit. Iumi savve faet againstim wei wea iumi no perfect, bat iumi no savve finisim diswan. Hem mekem kamap olketa wik point wea maet no savve finis. Nomata olsem, iumi shud no givap long wei for faet againstim olketa wik point bilong iumi. (Psalm 119:11) Why nao diswan hem barava important?

Bikos God no letem wei wea iumi no perfect for evritaem kamap excuse for duim nogud fasin. (Jude 4) Jehovah wantem olketa man for stretem laef bilong olketa, for garem gudfala living saed long fasin. Bible hem sei: “Barava heitim wicked samting.” (Romans 12:9) Why nao God hem strong tumas long diswan?

Wanfala reason hem bikos wei for no faet strong againstim wik point savve spoelem man. Bible hem sei long Galatians 6:7: “Eni samting man hem plantim, datwan nao bae hem harvestim.” Planti taem, olketa wea foldaon long olketa samting wea man depend long hem, greedy fasin, and fasin for olabaot savve kasem barava nogud samting insaed laef bilong olketa. Bat wanfala reason wea moa important stap.

Sin mekem God feel nogud. Hem kosim “wei for divaed” midolwan iumi and Jehovah. (Isaiah 59:2) From God kanduit hapi long olketa wea go ahed for duim sin, hem encouragem olketa olsem: “Wasim iufala seleva; mekem iufala seleva klin; . . . finis from wei for duim nogud samting.”—Isaiah 1:16.

Creator bilong iumi hem loving and showimaot mercy. “Hem no laekem eniwan for dae bat hem laekem evriwan for repent.” (2 Peter 3:9) Wei for foldaon evritaem long olketa wik point savve stopem wei wea God favorim iumi. From God no ting nating long olketa wik point bilong iumi, iumi tu shud duim olsem.

[Footnotes]